ജാനുവിനെ മര്‍ദ്ദിച്ചതിനെതിരെ ഗൗരിയമ്മ

തിരുവനന്തപുരം: ജാനുവിനെയും ഗീതാനന്ദനെയും മര്‍ദ്ദിച്ച പൊലീസ് നടപടി ശരിയായില്ലെന്ന് കൃഷിമന്ത്രി കെ.ആര്‍. ഗൗരിയമ്മ. മാര്‍ച്ച് ആറ് വ്യാഴാഴ്ച വാര്‍ത്താസമ്മേളനത്തില്‍ സംസാരിക്കുകയായിരുന്നു ഗൗരിയമ്മ.

മര്‍ദ്ദനത്തിന് താന്‍ എന്നും എതിരാണ്. വയലാര്‍ കലാപത്തിന് ശേഷം പൊലീസ് ജനങ്ങളെ വേട്ടയാടിയപ്പോള്‍ അതിനെതിരെ രംഗത്ത് വന്നാണ് താന്‍ രാഷ്ട്രീയത്തില്‍ എത്തിയതെന്നും ഗൗരിയമ്മ പറഞ്ഞു.

കാര്‍ഷികോല്പന്നങ്ങളുടെ കയറ്റുമതി പ്രോത്സാഹിപ്പിക്കാന്‍ ഒമ്പത് ജില്ലകളില്‍ കാര്‍ഷിക കയറ്റുമതി മേഖലകള്‍ തുടങ്ങും. ഇതിനായി 29.87 കോടി രൂപ നീക്കിവയ്ക്കും. സ്വകാര്യപങ്കാളിത്തത്തോടെയാണ് ഈ പദ്ധതി നടപ്പാക്കുക.

കേരളത്തിലെ കാര്‍ഷിക മേഖലയും കര്‍ഷകര്‍ നേരിടുന്ന പ്രശ്നങ്ങളും പരിഹരിക്കാനും കാര്‍ഷിക ഉല്പന്ന സംഭരണത്തിലെയും വിപണനത്തിലെയും പോരായ്മ പരിഹരിക്കാനുമാണ് കാര്‍ഷിക കയറ്റുമതി മേഖല ആരംഭിക്കുന്നത്.

ഉല്‍പന്നങ്ങളുടെ ശാസ്ത്രീയമായ സംഭരണവും, സംസ്കരണവും വിപണനവും ഉറപ്പുവരുത്തുകയാണ് ഉദ്ദേശ്യം. വാഴപ്പഴം, കൈതച്ചക്ക, തനതു പച്ചക്കറികള്‍, മരച്ചീനി, കായ് വര്‍ഗങ്ങള്‍ എന്നിവയുടെ കയറ്റുമതി മേഖലയാണ് ഇപ്പോള്‍ ഉദ്ദേശിക്കുന്നത്.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, പാലക്കാട് എന്നീ ഒന്‍പതു ജില്ലകളിലാണ് പദ്ധതി നടപ്പാക്കുക.