ഇന്ത്യന് എയര്ലൈന്സ് യാത്രാക്കൂലി കൂട്ടും
ദില്ലി: യാത്രാക്കൂലി 10 ശതമാനം വര്ധിപ്പിക്കാന് ഇന്ത്യന് എയര്ലൈന്സ് ആലോചിക്കുന്നു. ഇക്കോണമി, ബിസിനസ്, അപെക്സ് തുടങ്ങി എല്ലാ ക്ലാസുകളിലെയും യാത്രാക്കൂലിയില് 10 ശതമാനം വര്ധന വരുത്താനാണ് തീരുമാനമെന്നറിയുന്നു.
എവിയേഷന് ടര്ബൈന് ഇന്ധനവില കൂടിയതിനാലാണ് യാത്രാക്കൂലി വര്ധിപ്പിക്കാന് നിര്ബന്ധിതമാവുന്നതെന്ന് അറിയുന്നു. എവിയേഷന് ടര്ബൈന് ഇന്ധനവിലയില് 12 ശതമാനം വര്ധനവുണ്ടായി.
എവിയേഷന് ടര്ബൈന് ഇന്ധനവിലയില് തുടര്ച്ചയായുണ്ടാകുന്ന വര്ധന യാത്രാക്കൂലി വര്ധിപ്പിക്കാന് പ്രേരിപ്പിക്കുന്നു.- ഇന്ത്യന് എയര്ലൈന്സിന്റെ ഒരു ഉയര്ന്ന ഉദ്യോഗസ്ഥന് പറഞ്ഞു. എവിയേഷന് ഇന്ധനത്തിന്റെ എക്സൈസ് തീരുവ കുറയ്ക്കാന് സര്ക്കാരിനോട് ആവശ്യപ്പെട്ടെങ്കിലും കുറവു വരുത്തിയില്ലെന്നും ചൂണ്ടിക്കാണിക്കപ്പെടുന്നു.
പുതിയ യാത്രാ വര്ധന നിലവില് വന്നാല് ദില്ലി-മുംബൈ ഇക്കോണമി ക്ലാസ് യാത്രാക്കൂലി 7,271 രൂപയാകും. ഇപ്പോഴത്തെ യാത്രാനിരക്ക് 6,610 രൂപയാണ്. ദില്ലി-മുംബൈ ബിസിനസ് ക്ലാസ് ടിക്കറ്റ് നിരക്ക് 10,560 രൂപയായി വര്ധിക്കും. ഇപ്പോഴത്തെ നിരക്ക് 9,600 രൂപയാണ്.
ദില്ലി-ചെന്നൈ ഇക്കോണമി ക്ലാസ് ടിക്കറ്റിന് 10,560 രൂപ നല്കേണ്ടിവരും. ഇപ്പോള് 9,815 രൂപയാണ് ടിക്കറ്റ് നിരക്ക്. ബിസിനസ് ക്ലാസ് ടിക്കറ്റിന് 15,845 രൂപയാകും. ഇപ്പോഴത്തെ നിരക്ക് 14,405 രൂപയാണ്.
ഇന്ത്യന് എയര്ലൈന്സ് ടിക്കറ്റ് നിരക്ക് കൂട്ടുന്നതോടെ ജെറ്റ് എയര്വേയ്സ്, എയര് സഹാറാ എന്നിവരും വിമാനക്കൂലി വര്ധിപ്പിക്കും.