16ന് കേന്ദ്രമന്ത്രി മുത്തങ്ങയില്‍

തിരുവനന്തപുരം: കേന്ദ്ര ആദിവാസി ക്ഷേമ വകുപ്പ് മന്ത്രി ജുവല്‍ ഒറാം മാര്‍ച്ച് 16 ന് മുത്തങ്ങ സന്ദര്‍ശിയ്ക്കും.

മുത്തങ്ങയില്‍ ആദിവാസികള്‍ക്കെതിരെ നടന്ന അതിക്രമങ്ങളെക്കുറിച്ച് നേരിട്ട് മനസ്സിലാക്കാനായാണ് ഈ സന്ദര്‍ശനം. ആശുപത്രിയിലും ജയിലിലും കിടക്കുന്ന ആദിവാസികളെ മന്ത്രി സന്ദര്‍ശിയ്ക്കും.

ബി ജെ പി ആദിവാസികള്‍ക്കായി ശേഖരിച്ച ഭക്ഷ്യധാന്യങ്ങള്‍ മന്ത്രി വിതരണം ചെയ്യും. അന്ന് വൈകീട്ട് കോഴിക്കോട്ട് വിവിധ ഉദ്വോഗസ്ഥരുമായി ചര്‍ച്ച നടത്തും. 17 നാണ് അദ്ദേഹം ജയില്‍ സന്ദര്‍ശിയ്ക്കുന്നത്.

നേരത്തേ സംസ്ഥാന സര്‍ക്കാരിനോട് ഇതിനേക്കുറിച്ച് വിശദ വിവരങ്ങള്‍ മന്ത്രി അന്വേഷിച്ചിരുന്നു. ദേശീയ മനുഷ്യാവകാശ കമ്മിഷന്‍ സംസ്ഥാന സര്‍ക്കാരില്‍ നിന്ന് ലഭിയ്ക്കുന്ന റിപ്പോര്‍ട്ട് മന്ത്രിയ്ക്ക് നല്‍കുമെന്ന് നേരത്തേ പറഞ്ഞിരുന്നു. ഇത് കിട്ടിയ ശേഷം മുത്തങ്ങ സന്ദര്‍ശിയ്ക്കണോ വേണ്ടയോ എന്ന് തീരുമാനിയ്ക്കുമെന്നാണ് മന്ത്രി പറഞ്ഞിരുന്നത്.

ആദിവാസികള്‍ക്കിടയില്‍ പ്രചാരം നേടാനുള്ള ബി ജെ പി യുടെ ശ്രമത്തിന്റെ ഭാഗമാണ് ഈ സന്ദര്‍ശനമെന്നാണ് കരുതുന്നത്.