ഭവാനി: തമിഴ്നാട്ടില് പ്രക്ഷോഭം നടത്തും
കോയമ്പത്തൂര്: ഭവാനി പുഴയ്ക്ക് കുറുകെ മുക്കാലിയില് കേരള സര്ക്കാര് ഡാം കെട്ടുന്നതിനെതിരെ പ്രധാന പ്രതിപക്ഷ പാര്ട്ടികള് മൂന്ന് ഘട്ടങ്ങളിലായി പ്രക്ഷോഭം സംഘടിപ്പിക്കും.
കോയമ്പത്തൂരില് ചേര്ന്ന രാഷ്ട്രീയപാര്ട്ടികളുടെയും വിവിധ സംഘടനകളുടെയും യോഗത്തിലാണ് ഇതുസംബന്ധിച്ച തീരുമാനമുണ്ടായത്. എ ഐ എ ഡി എം കെയും ബി ജെ പിയും യോഗത്തില് പങ്കെടുത്തില്ല.
പ്രക്ഷോഭത്തിന്റെ ആദ്യഘട്ടത്തില് കോയമ്പത്തൂര്, ഈറോഡ് ജില്ലകളിലെ തിരഞ്ഞെടുത്ത കേന്ദ്രങ്ങളില് മാര്ച്ച് 15 മുതല് 24 വരെ യോഗങ്ങള് സംഘടിപ്പിയ്ക്കും. മാര്ച്ച് 20 മുതല് 25 വരെ കോയമ്പത്തൂര് ജില്ലയിലെ 12 കേന്ദ്രങ്ങളില് യോഗം നടത്തും.
രണ്ടാംഘട്ടത്തില് മാര്ച്ച് 25 മുതല് ഒരാഴ്ചത്തെ പ്രചാരണം സംഘടിപ്പിയ്ക്കും. ഏപ്രില് രണ്ടിന് കോയമ്പത്തൂര് ജില്ലയിലെ 12 കേന്ദ്രങ്ങളിലെ കേന്ദ്ര, സംസ്ഥാന സര്ക്കാര് ഓഫീസുകള്ക്ക് മുന്നില് ധര്ണ നടത്തും. ഏപ്രില് രണ്ടിന് ചേരുന്ന യോഗത്തില് ജില്ലയില് മനുഷ്യച്ചങ്ങല നടത്തുന്നതിനുള്ള തീയതി തീരുമാനിയ്ക്കും.