ജലപ്പാതയുടെ ആഴം കൂട്ടുന്നു

കൊച്ചി: കോട്ടപ്പുറത്തിനും കൊല്ലത്തിനുമിടയ്ക്ക് ദേശീയ ജലപ്പാതയില്‍ ആഴം കൂട്ടുന്നതിന് മണ്ണുമാന്താനായി ജലഗതാഗത അതോറിറ്റി മൂന്ന് സ്വകാര്യ കമ്പനികളെ ഏല്പിച്ചു.

മണ്ണുമാന്തല്‍ സുഗമമാക്കുന്നതിന് കൊച്ചി-കോട്ടപ്പുറം, ആലപ്പുഴ-കായംകുളം, കായംകുളം-ഇടപ്പള്ളി കോട്ട, ഇടപ്പള്ളികോട്ട-കൊല്ലം എന്നിങ്ങനെ നാല് മേഖലകളായി ജലപ്പാതയെ തിരിച്ചു.

കൊച്ചി-കോട്ടപ്പുറം മേഖലയില്‍ കുഴിയ്ക്കുന്നത് മുംബൈ കേന്ദ്രമായ ഐ എം എസ് ഷിപ്പിംഗ് മാനേജ്മെന്റാണ്. ആലപ്പുഴ-കായംകുളം മേഖല ക്രൗണ്‍ മാരി ടൈമിനും കായംകുളം-ഇടപ്പള്ളി കോട്ട, ഇടപ്പള്ളി കോട്ട- കൊല്ലം മേഖലകള്‍ ഹൈദരാബാദിലെ ഡിഡിസിഎല്ലിനുമാണ് നല്‍കിയിരിക്കുന്നത്.

അതിനിടെ മണ്ണുവാരുന്നത് മത്സ്യബന്ധനത്തെ ബാധിക്കുമെന്ന് ആരോപിച്ച് ഒരു വിഭാഗം മത്സ്യത്തൊഴിലാളികള്‍ മുന്നോട്ടുവന്നിട്ടുണ്ട്.

സംസ്ഥാനത്തെ ഉള്‍പ്രദേശ ജലഗതാഗതം മെച്ചപ്പെടുത്തുന്നതിന്റെ ഭാഗമായാണ് ജലപ്പാതയില്‍ ആഴം കൂട്ടുന്നത്. ചരക്കുകള്‍ കൊണ്ടുപോവുന്നത് സുഗമമാക്കാന്‍ ഇത് സഹായിക്കും.