സഭ അനിശ്ചിതകാലത്തേക്ക് പിരിഞ്ഞു

തിരുവനന്തപുരം: തുടര്‍ച്ചയായ പ്രതിപക്ഷ ബഹളത്തെ തുടര്‍ന്ന് നിയമസഭ അനിശ്ചിതകാലത്തേക്ക് പിരിയുന്നതായി സ്പീക്കര്‍ വക്കം പുരുഷോത്തമന്‍ അറിയിച്ചു.

മാര്‍ച്ച് 18 ചൊവാഴ്ച സഭ ചേര്‍ന്നയുടനെ പ്രതിപക്ഷനേതാവ് വി. എസ്. അച്യുതാനന്ദന്‍ എഴുന്നേറ്റ് ഇടതുമുന്നണി നടത്തിയ എസ് പി ഓഫീസ് മാര്‍ച്ചുകള്‍ക്ക് നേരെയുണ്ടായ പൊലീസ് അതിക്രമം സംബന്ധിച്ച പ്രശ്നമുന്നയിക്കാന്‍ ശ്രമിച്ചു.

പ്രശ്നം ചോദ്യോത്തരവേളയ്ക്ക് ശേഷം ഉന്നയിക്കാവുന്നതാണെന്ന് സ്പീക്കര്‍ പറഞ്ഞു. പക്ഷേ ക്ഷുഭിതരായ പ്രതിപക്ഷാംഗങ്ങള്‍ സഭയുടെ നടുത്തളത്തിലേക്കിറങ്ങി മുദ്രാവാക്യം മുഴക്കി. ഭരണപക്ഷാംഗങ്ങള്‍ക്ക് നേരെ പ്രതിപക്ഷാംഗങ്ങള്‍ നീങ്ങിയെങ്കിലും വാച്ച് ആന്റ് വാര്‍ഡ് ഇരുപക്ഷത്തിനുമിടയില്‍ മനുഷ്യമതില്‍ ഉണ്ടാക്കി.

ബഹളം തുടരവെ ധനകാര്യമന്ത്രി കെ. ശങ്കരനാരായണന്‍ അവതരിപ്പിച്ച വോട്ട് ഒണ്‍ അക്കൗണ്ട് പാസാക്കി. പ്രതിപക്ഷം ബഹളം തുടരുന്ന സാഹചര്യത്തില്‍ സഭ അനിശ്ചിതകാലത്തേക്ക് പിരിയുന്നതാണ് ഉചിതമെന്ന് മുഖ്യമന്ത്രി നിര്‍ദേശിച്ചു. തുടര്‍ന്ന് സഭ പിരിയുന്നതായി സ്പീക്കര്‍ അറിയിച്ചു.