പൊലീസുകാരെ പരേഡിലൂടെ കണ്ടെത്തും

തിരുവനന്തപുരം: മാധ്യമപ്രവര്‍ത്തകരെ മര്‍ദിച്ച പൊലീസുകാരെ തിരിച്ചറിയല്‍ പരേഡിലൂടെ കണ്ടെത്തി ശിക്ഷിക്കുമെന്ന് മുഖ്യമന്ത്രി എ. കെ. ആന്റണി പറഞ്ഞു.

മാധ്യമപ്രവര്‍ത്തകര്‍ക്ക് മെച്ചപ്പെട്ട തൊഴില്‍ അന്തരീക്ഷം സൃഷ്ടിക്കാന്‍ സര്‍ക്കാര്‍ ശ്രമിക്കും. മാര്‍ച്ച് 19 ബുധനാഴ്ച മന്ത്രിസഭായോഗത്തിന് ശേഷം വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.

മുത്തങ്ങ സംഭവത്തെ തുടര്‍ന്ന് ഏഷ്യാനെറ്റ് ലേഖകനെതിരെ കേസെടുത്തതിനെ ചൊല്ലി കേരള പത്രപ്രവര്‍ത്തക യൂണിയന്‍ നല്‍കിയ പരാതി പരിശോധിച്ചുവരികയാണ്.

സര്‍ക്കാരിനെതിരെ റിപ്പോര്‍ട്ടുകളെഴുതിയതിന്റെ പേരില്‍ ഒരു മാധ്യമപ്രവര്‍ത്തകനെതിരെയും കേസെടുക്കില്ല. മാധ്യമപ്രവര്‍ത്തകരെ ഉപദ്രവിക്കാന്‍ പൊലീസിനെ അനുവദിക്കില്ല. അതേ സമയം കഴിഞ്ഞ ദിവസങ്ങളില്‍ നടന്ന അക്രമസംഭവങ്ങളില്‍ ഒട്ടേറെ പൊലീസുകാര്‍ക്കും പരിക്കേറ്റിട്ടുണ്ടെന്ന കാര്യവും കണക്കിലെടുക്കണം- മുഖ്യമന്ത്രി പറഞ്ഞു.