മോഹന്‍കുമാര്‍ കമ്മിഷന്‍: നടപടി ബുധനാഴ്ച തീരുമാനിച്ചേക്കും

തിരുവനന്തപുരം: കല്ലുവാതുക്കല്‍ മദ്യദുരന്തത്തെ കുറിച്ച് അന്വേഷണം നടത്തിയ ജസ്റിസ് വി. പി. മോഹന്‍കുമാര്‍ കമ്മിഷന്റെ റിപ്പോര്‍ട്ടിന്റെ അടിസ്ഥാനത്തില്‍ സ്വീകരിക്കേണ്ട നടപടികള്‍ സംബന്ധിച്ച് മാര്‍ച്ച് 19 ബുധനാഴ്ച ചേരുന്ന മന്ത്രിസഭായോഗം തീരുമാനിച്ചേക്കും.

മദ്യമാഫിയയുമായി ബന്ധമുള്ള ചില ഉദ്യോഗസ്ഥരെയും രാഷ്ട്രീയക്കാരെയും കമ്മിഷന്‍ റിപ്പോര്‍ട്ടില്‍ കുറ്റപ്പെടുത്തിയിരുന്നു. ഇവര്‍ക്കെതിരെ നടപടി സ്വീകരിക്കാന്‍ തീരുമാനമുണ്ടായേക്കും. ഉദ്യോഗസ്ഥര്‍ക്കെതിരെ വിജിലന്‍സ് കേസും രാഷ്ട്രീയക്കാര്‍ക്കെതിരെ ക്രിമിനല്‍ കേസെടുക്കാനുമാണ് നീക്കം.

യു ഡി എഫ് കണ്‍വീനര്‍ ഉമ്മന്‍ചാണ്ടിയുടെ സാന്നിധ്യത്തില്‍ മന്ത്രിമാരുടെ അനൗപചാരിക യോഗം ചൊവാഴ്ച ചേര്‍ന്നിരുന്നു. കഴിഞ്ഞ എല്‍ ഡി എഫ് സര്‍ക്കാരിന്റെ കാലത്ത് സെക്രട്ടറിയേറ്റിന് മുന്നില്‍ സ്വാതന്ത്യ്രസ്മാരകം നിര്‍മിച്ചതിലെ അഴിമതിയെ കുറിച്ചുള്ള അന്വേഷണം ഊര്‍ജിതപ്പെടുത്താന്‍ യോഗത്തില്‍ തീരുമാനിച്ചിട്ടുണ്ട്.