യുദ്ധത്തിന് ഒരുക്കമെന്ന് സദ്ദാം

ബാഗ്ദാദ്: 48 മണിക്കൂറിനുള്ളില്‍ സദ്ദാം ഹുസൈന്‍ ഇറാക്ക് വിടണമെന്ന അമേരിക്കയുടെ അന്ത്യശാസനം ഇറാക്ക് തള്ളി.

ദേശീയടെലിവിഷനില്‍ സൈനിക വേഷത്തില്‍ പ്രത്യക്ഷപ്പെട്ട സദ്ദാം ഹുസൈന്‍ ഇറാക്ക് യുദ്ധത്തിന് സന്നദ്ധമാണെന്ന് പ്രഖ്യാപിച്ചു. ഭരിക്കുന്ന റവല്യൂഷണി കമാന്റ് കൗണ്‍സിലിന്റെയും ബാത്ത് പാര്‍ട്ടി നേതൃത്വത്തിന്റെയും സംയുക്ത യോഗത്തിന് ശേഷമാണ് സദ്ദാം ദേശീയ ടെലിവിഷനില്‍ പ്രത്യക്ഷപ്പെട്ടത്.

1991ലെ ഗള്‍ഫ് യുദ്ധത്തിന് ശേഷം ഇത്തരത്തില്‍ സദ്ദാം സൈനിക വേഷത്തില്‍ സദ്ദാം പ്രത്യക്ഷപ്പെടുന്നത് ആദ്യമായാണ്.

ഇറാക്കിലെ തെരുവുകളില്‍ ആയിരങ്ങള്‍ സദ്ദാം ഹുസൈന് പിന്തുണ പ്രഖ്യാപിച്ച് പ്രകടനങ്ങള്‍ നടത്തി. അമേരിക്കയുടെ അന്ത്യശാസനം രാജ്യാന്തര നിയമങ്ങളുടെ ലംഘനമാണെന്ന് അറബ് ലീഗ് അഭിപ്രായപ്പെട്ടു.

അമേരിക്കയുടെ അന്ത്യശാസനം അനുസരിച്ച് ഇന്ത്യന്‍ സമയം മാര്‍ച്ച് 20 വ്യാഴാഴ്ച രാവിലെ 6.30ന് ശേഷം എപ്പോഴും ഇറാക്ക് ആക്രമിക്കപ്പെടാം.