ശത്രുക്കള് അപമാനിതരാകും: സദ്ദാം
ബാഗ്ദാദ്: ഇറാഖിനെ ആക്രമിക്കാന് വരുന്ന ശത്രുക്കള് അപമാനിതരാകുമെന്ന് സദ്ദാം ഹുസൈന്. മാര്ച്ച് 20 വ്യാഴാഴ്ച ഇറാഖി ടെലിവിഷനില് രാജ്യത്തോടായി നടത്തിയ പ്രത്യേക അഭിസംബോധനയിലാണ് സദ്ദാം ഹുസൈന് ഇക്കാര്യം അറിയിച്ചത്.
യുഎസ്-ബ്രിട്ടീഷ് സേന ആക്രമണം തുടങ്ങിയതിന് ശേഷം ഇതാദ്യമായാണ് സദ്ദാം ഇറാഖി ടെലിവിഷനില് പ്രത്യക്ഷപ്പെട്ടത്. ഇറാഖിനോട് ശത്രുക്കള് തികച്ചും അനീതിയോടെയാണ് പെരുമാറിയതെന്ന് സദ്ദാം പറഞ്ഞു.
ഇറാഖിനെ സംരക്ഷിക്കുകയെന്നത് ഓരോ പൗരന്റെയും കടമയാണ്. യുഎസ് പ്രസിഡന്റ് ബുഷ് ഇപ്പോള് ചെയ്തത് ലജ്ജാകരമായ കുറ്റമാണെന്നും സദ്ദാം പറഞ്ഞു.
ഇറാഖും മനുഷ്യത്വവും ഒടുവില് വിജയം വരിക്കും. യുഎസും സഖ്യകക്ഷികളും മുറുകെപ്പിടിച്ചിരിക്കുന്ന തിന്മയും കുറ്റകൃത്യവും ഒടുവില് പരാജയപ്പെടും. ഞങ്ങള് സമാധാനത്തെ സ്നേഹിക്കുന്നു.- സദ്ദാം പറഞ്ഞു.
പ്രത്യേകിച്ച് യാതൊരു ഭാവഭേവുമില്ലാതെയാണ് പട്ടാളവേഷമണിഞ്ഞ സദ്ദാം ഹുസൈന് ടെലിവിഷന് മുന്നില് പ്രത്യക്ഷപ്പെട്ടത്. ഒളിച്ചോടാനല്ല, അവസാനം വരെ പൊരുതി മരിക്കാനാണ് ഉദ്ദേശിക്കുന്നതെന്ന് വ്യക്തമാക്കുന്നതായിരുന്നു സദ്ദാമിന്റെ പ്രസംഗം. നേരത്തെ ഇറാഖി റേഡിയോ ബന്ധവും ടെലിവിഷന് ബന്ധവും യുഎസ് വിച്ഛേദിച്ചതായി വാര്ത്തയുണ്ടായിരുന്നു. എന്നാല് അധികം വൈകാതെ ഇത് പുന:സ്ഥാപിക്കപ്പെട്ടു.