ഇറാഖ് സേന മധ്യഇറാഖിലേക്ക്

ബാഗ്ദാദ്: സഖ്യസേനയ്ക്കെതിരായ പോരാട്ടത്തിന് ഇറാഖിന്റെ റിപ്പബ്ലിക്കന്‍ ഗാര്‍ഡ് ആയിരം വാഹനങ്ങളിലായി ബാഗ്ദാദില്‍ നിന്നും മധ്യഇറാഖിലേക്ക് നീങ്ങി.

തെക്കന്‍ ഇറാഖില്‍ സഖ്യസേന ഇറാഖിന്റെ ടാങ്കുകളുടെയും വാഹനങ്ങളുടെയും നിരക്ക് നേരെ ശക്തമായ ആക്രമണം നടത്തി. വടക്കന്‍ ഇറാഖില്‍ ആയിരത്തോളം അമേരിക്കന്‍ സൈനികര്‍ എത്തിയിട്ടുണ്ട്. വടക്ക് ഭാഗത്തു നിന്നും സദ്ദാമിന്റെ കേന്ദ്രത്തിന് നേരെ ആക്രമണം നടത്തുക എന്ന ലക്ഷ്യത്തോടെയാണിതെന്ന് യു എസ് സൈനിക വക്താവ് പറഞ്ഞു.

ശക്തമായ മണല്‍കാറ്റ് സഖ്യസേനയുടെ ആക്രമണത്തെ പ്രതികൂലമായി ബാധിച്ചിട്ടുണ്ട്. ബാഗ്ദാദില്‍ നിന്നും 80 കിലോമീറ്റര്‍ അകലെയുള്ള യു എസ് സേനയുടെ മൂന്നാം ഇന്‍ഫാന്‍ട്രി വിഭാഗം മണല്‍ക്കാറ്റ് മൂലം പിന്തിരിഞ്ഞു.

തെക്കന്‍-മധ്യ ഇറാഖില്‍ റിപ്പബ്ലിക്കന്‍ ഗാര്‍ഡിന്റെ പ്രത്യേക സേന സഖ്യസേനയ്ക്ക് നേരെ ആക്രമണം നടത്തി നാശനഷ്ടങ്ങള്‍ വരുത്തിയതായി ഇറാഖിന്റെ സൈനിക വക്താവ് പറഞ്ഞു. ആറ് വാഹനങ്ങള്‍ ആക്രമണത്തില്‍ തകര്‍ന്നു.

ബസ്രയ്ക്കടുത്ത് ഞായറാഴ്ച മുതല്‍ രണ്ട് ബ്രിട്ടീഷ് സൈനികരെ കാണാതായിട്ടുണ്ട്. ബ്രിട്ടീഷ് ഐ ടി എന്‍ ടെലിവിഷന്റെ രണ്ട് മാധ്യമപ്രവര്‍ത്തകരെയും ഈ ഭാഗത്ത് കാണാതായിട്ടുണ്ട്.