കോടോത്തിന് സി.പി.മുഹമ്മദും വോട്ട് ചെയ്യില്ല

തിരുവനന്തപുരം: രാജ്യസഭാ തിരഞ്ഞെടുപ്പില്‍ വിമതസ്ഥാനാര്‍ഥി കോടോത്ത് ഗോവിന്ദന്‍നായര്‍ക്ക് ഐ ഗ്രൂപ്പ് എം എല്‍ എമാരില്‍ ഒരാള്‍ കൂടി വോട്ട് ചെയ്യില്ല. കെ. വി. തോമസിന് പിന്നാലെ സി. പി. മുഹമ്മദാണ് ഗ്രൂപ്പ് വിട്ടത്.

കോടോത്ത് ഗോവിന്ദന്‍നായര്‍ക്ക് വോട്ട് ചെയ്യുമെന്ന് രേഖപ്പെടുത്തുന്ന കത്ത് 25 ഐ ഗ്രൂപ്പ് എം എല്‍ എമാര്‍ കരുണാകരന് നല്‍കി. കത്തില്‍ കെ. വി. തോമസും സി. പി. മുഹമ്മദും ഒപ്പുവച്ചില്ല.

ഐ ഗ്രൂപ്പ് എം എല്‍ എമാര്‍ കോടോത്തിന് മാത്രമേ വോട്ട് ചെയ്യേണ്ടതുള്ളൂവെന്ന് തീരുമാനിച്ചു. രണ്ടാം ഗ്രൂപ്പ് മറ്റാര്‍ക്കെങ്കിലും ചെയ്താല്‍ കോടോത്തിന്റെ വിജയസാധ്യതയെ ബാധിക്കാനിടയുണ്ട് എന്നതിനാലാണിത്.

പ്രതിപക്ഷ എം എല്‍ എമാരുടെ രണ്ടാം വോട്ട് കോടോത്തിന് നല്‍കുമെന്ന് കേരള കോണ്‍ഗ്രസ് (ജെ) നേതാവ് പി. സി. ജോര്‍ജ് കരുണാകരനെ അറിയിച്ചു. കരുണാകരന്റെ വീട്ടിലെത്തിയാണ് ഇക്കാര്യം പി. സി. ജോര്‍ജ് അറിയിച്ചത്.