കാറോട്ടം: സച്ചിന്റെ പുതിയ ഹരം
ചെന്നൈ: ക്രിക്കറ്റ് സച്ചിന് ഗൗരവമുള്ള കാര്യമാണെങ്കില് കാറോട്ടം അദ്ദേഹത്തിന്റെ ഹരമാണ്. എല്ലാ പിരിമുറുക്കങ്ങളും വേഗതയില് അലിഞ്ഞുപോകുന്നുവെന്ന് സച്ചിന് ടെണ്ടുല്ക്കര്.
ചെന്നൈയില് മെയ് അഞ്ച്, ആറ് തീയതികളില് നടക്കുന്ന എംആര്എഫ്-എംഎഐ ഫോര്മുല മൊണ്ടിയേല് ചാമ്പ്യന്ഷിപ്പില് (സ്പെഷ്യല് ക്ലാസ്) സച്ചിന് പങ്കെടുക്കും. ഇതിന് മുന്നോടിയായി സച്ചിന് കഴിഞ്ഞ ദിവസം മുംബൈയില് പരിശീലനം നടത്തി.
മത്സരത്തില് തീര്ച്ചയായും പങ്കെടുക്കും- സ്പീഡ് കാറില് പരിശീലനം നടത്തിയ ശേഷം സച്ചിന്റെ ആദ്യപ്രതികരണം ഇതായിരുന്നു. നേരത്തെ എംആര്എഫിന് വേണ്ടി ടിവി പരസ്യത്തിന് ഞാന് സ്പീഡ് കാര് ഓടിച്ചിട്ടുണ്ട്. പക്ഷെ യഥാര്ത്ഥ ട്രാക്കില് വണ്ടിയോടിച്ചപ്പോള് ഈ പരിശീലനം തികച്ചും വ്യത്യസ്താനുഭവമായി.- സച്ചിന് പറഞ്ഞു.
കാറോട്ടമത്സരരംഗം ഗൗരവമായി എടുക്കുമോ എന്ന ചോദ്യത്തിന് അത് നല്ല നേരമ്പോക്ക് മാത്രമാണെന്നായിരുന്നു സച്ചിന്റെ മറുപടി. ട്രാക്കില് മറ്റ് തടസ്സങ്ങളൊന്നുമില്ലെങ്കില് പരമാവധി വേഗതയില് കാറോടിക്കുന്നത് നല്ല അനുഭവമാണെന്ന് സച്ചിന് പറയുന്നു.