ചാലിയാറിലും കെട്ടുവള്ളങ്ങള് വരുന്നു
കോഴിക്കോട്: മലബാറിന്റെ പ്രകൃതി ഭംഗി ആസ്വദിയ്ക്കാന് ചാലിയാറിലും കെട്ടുവള്ളങ്ങള് വരുന്നു. ആധുനിക സൗകര്യങ്ങള് ഉള്ള വീട്ടിന് സമാനമായ കെട്ടുവള്ളങ്ങള്.
കേരളത്തിന്റെ തെക്കന് ഭാഗങ്ങളില് ഹൗസ് ബോട്ടുകള് ഉണ്ടെങ്കിലും ഇതുവരെ മലബാര് മേഖലയില് ബോട്ടുകള് ഉണ്ടായിരുന്നുല്ല. കോഴിക്കോട്ട് രാമനാട്ടുകരയിലെ കടവ് എന്ന വിനോദ സഞ്ചാര കേന്ദ്രമാണ് മേയ് രണ്ടിന് ചാലിയാറില് ഹൗസ് ബോട്ട് ഇറക്കുന്നത്.
30 പേര്ക്ക് വരെ കയറാവുന്നതാണ് ഈ വള്ളങ്ങള്. വേണമെങ്കില് വള്ളത്തില് തന്നെ വിരുന്നും ഒരുക്കാം. കോക്ക് ടേല് വിരുന്നോ ബിസിനസ് യോഗങ്ങളോ നടത്താനുള്ള എല്ലാ സൗകര്യങ്ങളും ഇതിലുണ്ട്. വേണമെങ്കില് ചാലിയാറില് നിന്ന് മീനും പിടിയ്ക്കാം. കടലുണ്ടിയിലെ പക്ഷി സങ്കേതം കാണാം, ബേപ്പൂരിലെ സൂര്യാസ്തമയം ആസ്വദിയ്ക്കാം, ഇങ്ങനെ സൗകര്യങ്ങള് ഒട്ടേറെയാണ്.
ബോട്ടില് തന്നെ ചെറിയ അടുക്കളയും പാചകക്കാരനും ഉണ്ട്. പിടിച്ച മീന് പൊരിച്ച് കഴിയ്ക്കാനും ഉണ്ട് സൗകര്യം. പക്ഷേ ഈ ബോട്ടില് രാത്രി ഉറങ്ങാനുള്ള സൗകര്യം ഇപ്പോഴില്ല. മൂന്ന് മണിയ്ക്കൂര് ഇതില് യാത്രചെയ്യാന് 2,500 രൂപയാണ് ചെലവ്. ഭക്ഷണത്തിനുള്ള പണം വേറേ നല്കണം.
ചാലിയാറില് ഓടിയ്ക്കാനായി വാട്ടര് സ്കൂട്ടറുകള് വാങ്ങാന് ആലോചിയ്ക്കുകയാണ് കടവ് റിസോര്ട്ട് കാര്. അന്തി ഉറങ്ങാന് സൗകര്യമുള്ള കെട്ടുവള്ളങ്ങളും വൈകാതെ തുടങ്ങുമെന്ന് കടവിന്റെ അധികൃതര് പറയുന്നു.