തൊഗാഡിയ വാജ്പേയിയ്ക്കെതിരെ

ദില്ലി: വീണ്ടും പാകിസ്ഥാനുമായി അടുക്കാനുള്ള വാജ്പേയിയുടെ ശ്രമങ്ങളെ വിഎച്ച്പി നേതാവ് പ്രവീണ്‍ തൊഗാഡിയ രൂക്ഷമായി വിമര്‍ശിച്ചു. മെയ് നാല് ഞായറാഴ്ച നടന്ന ഒരു ത്രിശൂലം വിതരണയോഗത്തിലാണ് വാജ്പേയിയ്ക്കെതിരെ തൊഗാഡിയ വിമര്‍ശനങ്ങള്‍ ചൊരിഞ്ഞത്.

വ്യക്തികളെ വിമര്‍ശിക്കരുതെന്ന് കഴിഞ്ഞ ദിവസം ചേര്‍ന്ന ത്രിദിന സംഘ്പരിവാര്‍ രഹസ്യയോഗത്തിലെ തീരുമാനം ലംഘിക്കുകയായിരുന്നു തൊഗാഡിയ. പാകിസ്ഥാനോട് ക്ഷമിയ്ക്കുന്നതിന് പകരം പാകിസ്ഥാനെ ശിക്ഷിയ്ക്കുകയാണ് വേണ്ടതെന്നും തൊഗാഡിയ പറഞ്ഞു.

ലാഹോര്‍ ബസോ സംജുക്ത എക്സ്പ്രസോ ആഗ്ര സംഭാഷണങ്ങളോ ഞങ്ങള്‍ക്ക് വേണ്ട. പകരം ലാഹോറില്‍ ഇന്ത്യയുടെ യുദ്ധടാങ്കുകളും റാവല്‍ പിണ്ടിയില്‍ ഇന്ത്യയുടെ മിസ്സിലുകളും കറാച്ചിയില്‍ കാവിപ്പതാകയുമാണ് ആവശ്യം. - തൊഗാഡിയ പറഞ്ഞു.

പാകിസ്ഥാന്റെ അതിര്‍ത്തികടന്നുള്ള തീവ്രവാദത്തിനെതിരെ വാജ്പേയി ഇടയ്ക്കിടെ നല്കാറുള്ള താക്കീതുകളെയും തൊഗാഡിയ പരിഹസിച്ചു. പാകിസ്ഥാനെതിരായ ഇത്തരം താക്കീതുകളിലൂടെ താങ്കളും സച്ചിന്‍ ടെണ്ടുല്‍ക്കറെപ്പോലെ സെഞ്ച്വറി അടിക്കുകയാണ്. ജിഹാദ് തീവ്രവാദം ഇത്തരം താക്കീതുകള്‍കൊണ്ട് തീരില്ല. ഇന്ത്യയെ വീണ്ടും പഴയപോലെ ഏകീകരിക്കുന്നതുവരെ, പാകിസ്ഥാനെ ഇല്ലാതാക്കുന്നതുവരെ ഇത് തുടരും. കശ്മീര്‍ മുതല്‍ കന്യാകുമാരി വരെ നമ്മള്‍ വേദനിക്കുന്നതുപോലെ കറാച്ചി മുതല്‍ കാണ്ഡഹാര്‍ വരെ പാകിസ്ഥാനെയും വേദനിപ്പിക്കണം. - അദ്ദേഹം പറഞ്ഞു.

ഞങ്ങള്‍ ഒരു പാര്‍ട്ടിയുടെയും അടിമകളല്ല. ത്രിശൂലം വിതരണം ബിജെപിയെ വിജയിപ്പിക്കാനോ കോണ്‍ഗ്രസിനെ തോല്പിക്കാനോ ഉള്ളതല്ല.- തൊഗാഡിയ പറഞ്ഞു.