നാളികേരസമ്മേളനം ബുധനാഴ്ച

കൊച്ചി: അഞ്ച് ദിവസത്തെ അന്താരാഷ്ട്ര നാളികേര സമ്മേളനം മെയ് ഏഴ് ബുധനാഴ്ച ആരംഭിയ്ക്കും. 500ല്‍ പരം പ്രതിനിധികള്‍ പങ്കെടുക്കുന്ന സമ്മേളനത്തിന് നാളികേര കര്‍ഷകരില്‍ നിന്ന് നല്ല പ്രതികരണമാണ് ലഭിയ്ക്കുന്നതെന്ന് സമ്മേളനത്തിന്റെ ചെയര്‍മാന്‍ പ്രൊഫ. ഐ.കെ. വാസു വാര്‍ത്താസമ്മേളനത്തില്‍ പറഞ്ഞു.

ഒട്ടേറെ രാജ്യങ്ങളുടെ സാമ്പത്തികഘടനയെ നിയന്ത്രിയ്ക്കുന്ന ശക്തിയാണെങ്കിലും നാളികേരത്തിന് ഇപ്പോഴും അര്‍ഹമായ സ്ഥാനം ലഭിച്ചിട്ടില്ലെന്നും വാസു പറഞ്ഞു. ഏഴ് വിഷയങ്ങളായി തിരിച്ച് നടക്കുന്ന ചര്‍ച്ചയില്‍ നാളികേരവ്യവസായം നേരിടുന്ന എല്ലാ പ്രശ്നങ്ങളും ചര്‍ച്ച ചെയ്യും.

വൈവിധ്യവല്ക്കരണം, സാങ്കേതികപരിഷ്കാരം, ബഹുവിളസാധ്യത, വ്യവസായ സംരംഭകത്വത്തിന്റെ സാധ്യതകള്‍ എന്നിവയായിരിക്കും ചര്‍ച്ചയുടെ പ്രധാന ഊന്നല്‍. ഈ സമ്മേളനത്തിലെ നിഗമനങ്ങളും നിര്‍ദേശങ്ങളും നാളികേരം കൃഷി ചെയ്യുന്ന സംസ്ഥാനങ്ങള്‍ക്കും രാഷ്ട്രങ്ങള്‍ക്കും അയച്ചുകൊടുക്കും.

പ്രത്യേക പ്രദര്‍ശനവും സംഘടിപ്പിച്ചിട്ടുണ്ട്. നാളികേരവുമായി ബന്ധപ്പെട്ട ഉല്പന്നങ്ങള്‍ ഇവിടെ പ്രദര്‍ശനത്തിനുണ്ടാവും. അഞ്ച് നാളികേര കര്‍ഷകരെ യോഗം ആദരിയ്ക്കും. കേന്ദ്ര കൃഷിസഹമന്ത്രി നാരായണന്‍ യാദവ് സമ്മേളനം ഉദ്ഘാടനം ചെയ്യും.