കാലടിയെ ദേശീയതീര്‍ത്ഥാനടകേന്ദ്രമാക്കും

കൊച്ചി: ആദിശങ്കരന്റെ ജന്മസ്ഥലമായ കാലടിയെ ദേശീയ തീര്‍ത്ഥാടനകേന്ദ്രമാക്കി മാറ്റാന്‍ നടപടിയെടുക്കുമെന്ന് മുഖ്യമന്ത്രി എ.കെ. ആന്റണി. ശ്രീശങ്കര ത്രൈജയന്തി മഹോത്സവത്തിന്റെ സമാപനസമ്മേളനം ഉദ്ഘാടനം ചെയ്യുകയായിരുന്നു മുഖ്യമന്ത്രി.

ഇക്കാര്യത്തിലേക്ക് ശ്രദ്ധയാകര്‍ഷിക്കാന്‍ മെയ് 18ന് കേരളത്തിലെത്തുന്ന ഉപപ്രധാനമന്ത്രി എല്‍.കെ. അദ്വാനിയെ കാലടിയിലേയ്ക്ക് ക്ഷണിക്കുമെന്നും ആന്റണി പറഞ്ഞു. ഭാരതത്തിന്റെ ആദ്യ നവോത്ഥാനനായകനായിരുന്നു ആദിശങ്കരന്‍. തലമുറകള്‍ എത്ര കഴിഞ്ഞാലും മാര്‍ഗ്ഗദീപമാകാന്‍ കഴിയുന്നു എന്നതാണ് ആദിശങ്കരന്റെ പ്രസക്തി. കാലടി ദേശീയതീര്‍ത്ഥാടനകേന്ദ്രമാക്കാന്‍ ബൃഹത്തായ പദ്ധതി കൊണ്ടുവരും. കേന്ദ്രസഹായത്തോടെ ഇത് നടപ്പാക്കാന്‍ ശ്രമിയ്ക്കുമെന്നും ആന്റണി പറഞ്ഞു.

ചടങ്ങില്‍ റവന്യൂമന്ത്രി കെ.എം. മാണി അധ്യക്ഷനായിരുന്നു. സ്വാമി ജയേന്ദ്ര സരസ്വതി, സ്വാമി ശ്രീശങ്കര വിജയേന്ദ്ര സരസ്വതി, കര്‍ണാടകയിലെ കൂടലീമഠം ശങ്കരാചാര്യ എന്നിവരും ചടങ്ങില്‍ സംബന്ധിച്ചു.

പി.ജെ. ജോയി എംഎല്‍എ, എന്‍എസ്എസ് കുന്നത്തുനാട് താലൂക്ക് യൂണിയന്‍ പ്രസിഡന്റ് പി.എസ്. രാജന്‍ എന്നിവര്‍ പ്രസംഗിച്ചു. ആദിശങ്കരാചാര്യരുടെ 2510ാം ജയന്തി, കാഞ്ചി കാമകോടി മഠാധിപതി സ്വാമി ജയേന്ദ്ര സരസ്വതിയുടെ പീഠാരോഹണ സുവര്‍ണ്ണജൂബിലി, കീര്‍ത്തിസ്തംഭത്തിന്റെ രജത ജൂബിലി എന്നിവയുടെ ആഘോഷങ്ങളിലാണ് കാലടി ഇപ്പോള്‍.