ആന്റണി രാജിവയ്ക്കണം: നായനാര്‍

തിരുവനന്തപുരം: വര്‍ഗ്ഗീയ കലാപങ്ങളില്‍ 16 പേര്‍ മരിച്ചിട്ടും ആന്റണിയ്ക്ക് യാതൊരു ഭാവഭേദവുമില്ല. നാണില്ലാതെ ഇപ്പോഴും ആന്റണി തന്നെ ആഭ്യന്തര വകുപ്പ് കൈകാര്യം ചെയ്യുന്നു. ഇ. കെ. നായനാര്‍ ആരോപിച്ചു. മാറാട് സംഭവത്തിന്റെ ഉത്തരവാദിത്തമേറ്റെടുത്ത് ആന്റണി രാജിവയ്ക്കുകയാണ് വേണ്ടതെന്നും നായനാര്‍ പറഞ്ഞു.

മാറാട് സംഭവത്തിന് പിന്നിലെ സത്യം പുറത്തു കൊണ്ടുവരണമെന്നാവശ്യപ്പെട്ട് ഇടതുപക്ഷപ്രവര്‍ത്തകര്‍ നടത്തിയ ഉപവാസം തിരുവനന്തപുരത്ത് ഉദ്ഘാടനം ചെയ്യുകയായിരുന്നു നായനാര്‍.

ഇവിടെ നടക്കുന്ന വര്‍ഗ്ഗീയ കലാപങ്ങളുടെ ഉത്തരവാദി താന്‍ കൂടിയാണെന്ന് സമ്മതിച്ചുകൊണ്ടാണ് ആന്റണി നാണില്ലാതെ ആ കസേരയില്‍ കടിച്ച് തൂങ്ങി ഇരിയ്ക്കുന്നത്. വര്‍ഗ്ഗീയ കക്ഷികളുടെ വോട്ട് നേടി അധികാരത്തിലെത്തിയ ആന്റണി കശാപ്പ് രാഷ്ട്രീയമാണ് കേരളത്തില്‍ നടത്തുന്നത്. ഇടതുമുന്നണി തിരുവനന്തപുരം ഈസ്റ് നിയോജക മണ്ഡലം കമ്മറ്റിയാണ് പാളയത്ത് ഏകദിന ഉപവാസം നടത്തിയത്. മാറാട്സംഭവത്തിന് ശേഷം പൂര്‍ണ്ണമായി സമാധാനം നടപ്പാക്കാന്‍ ആന്റണി നടപടി എടുത്തില്ല. ഇവിടെ തീവ്രവാദികള്‍ ഭരണത്തിലും സ്വാധീനം ചെലുത്തുകയാണെന്ന് നായനാര്‍ ആരോപിച്ചു.

സംസ്ഥാനത്തെ 140 നിയോജകമണ്ഡലങ്ങളിലും ഇടതുപക്ഷ പ്രവര്‍ത്തകര്‍ ഉപവാസം സംഘടിപ്പിച്ചിട്ടുണ്ട്. കോഴിക്കോട് നടന്ന ഉപവാസം പി. മോഹനന്‍ മാസ്റര്‍ ഉദ്ഘാടനം ചെയ്തു. അഴിക്കോട് നടന്ന ഉപവാസ സമ്മേളനം വി. ദക്ഷിണാമൂര്‍ത്തി ഉദ്ഘാടനം ചെയ്തു.