സിബിഐ അന്വേഷണം വേണം: കേന്ദ്രമന്ത്രി

കോഴിക്കോട്: മാറാട് കൂട്ടക്കൊലയെക്കുറിച്ച് ഒരു സിബിഐ അന്വേഷണം തന്നെ ആവശ്യമാണെന്ന് കേന്ദ്ര പ്രതിരോധസഹമന്ത്രി ഒ. രാജഗോപാല്‍. മെയ് 11 ഞായറാഴ്ച മാറാട് സന്ദര്‍ശിച്ച ശേഷം വാര്‍ത്താലേഖകരോട് സംസാരിക്കുകയായിരുന്നു മന്ത്രി.

ഇസ്ലാമിക മതമൗലിക ഗ്രൂപ്പായ എന്‍ഡിഎഫിന് ഈ കൂട്ടക്കൊലയില്‍ ബന്ധമുണ്ടെന്നതിന്റെ മതിയായ തെളിവുകള്‍ കേന്ദ്രത്തിന് കിട്ടിയിട്ടുണ്ട്. മാത്രമല്ല, ഒരു സംസ്ഥാനമന്ത്രിയ്ക്ക് ഇതില്‍ പങ്കുണ്ടോ എന്ന കാര്യം ഉറപ്പാക്കേണ്ടതുമുണ്ട്. അതിനാല്‍ സിബിഐ അന്വേഷണം തന്നെയായിരിക്കും കൂടുതല്‍ ഉചിതമെന്നും അദ്ദേഹം ചൂണ്ടിക്കാട്ടി.

സിബിഐയെപ്പോലെ കാര്യക്ഷമമാകില്ല ജുഡീഷ്യല്‍ അന്വേഷണം. കാരണം സംസ്ഥാനത്തിന് പുറത്തുള്ള തീവ്രവാദശക്തികള്‍ക്കും ഈ കൂട്ടക്കൊലയുമായി ബന്ധമുണ്ടെന്ന് സംശയിക്കുന്നുണ്ട്. - അദ്ദേഹം പറഞ്ഞു.

എന്‍ഡിഎഫിന് ഈ കൂട്ടക്കൊലയില്‍ ബന്ധമുണ്ടെന്ന് കേന്ദ്രത്തിന് തെളിവുകള്‍ കിട്ടിയിട്ടുണ്ട്. മാത്രമല്ല മുസ്ലിംലീഗിലെ ഒരു മന്ത്രിയ്ക്ക് ഈ സംഭവവുമായി ബന്ധമുണ്ടെന്നും ആരോപണമുണ്ട്. മുസ്ലിം ലീഗിന് നാല് മന്ത്രിമാരുണ്ടായിരിക്കെ എന്തുകൊണ്ടാണ് ഒരു മന്ത്രിയുടെ പേരില്‍ മാത്രം കുറ്റാരോപണമുണ്ടായി?അതിനാല്‍ സത്യം പുറത്തുവരണമെങ്കില്‍ സിബിഐ അന്വേഷണം തന്നെ വേണം - രാജഗോപാല്‍ പറഞ്ഞു.