മാറാട്: സര്‍ക്കാരിനെതിരെ ഐഎന്‍എല്‍

കോഴിക്കോട്: 2002ലെ മാറാട് കലാപത്തില്‍ ഇതുവരെ കുറ്റപത്രം പോലും സമര്‍പ്പിക്കാതിരുന്നതിന് സര്‍ക്കാരിനെ ഐഎന്‍എല്‍ രൂക്ഷമായി വിമര്‍ശിച്ചു.

വീണ്ടും അതേ പ്രദേശത്ത് കഴിഞ്ഞതിനേക്കാളും വലിയ കലാപം ആവര്‍ത്തിച്ചപ്പോഴാണ് കുറ്റപത്രം നല്കാന്‍ സര്‍ക്കാര്‍ നിര്‍ബന്ധിതരായത്. സംഭവങ്ങളുടെ ദയനീയ സ്ഥിതിയാണ് ഇത് കാണിക്കുന്നത്. - ഐഎന്‍എല്‍ സംസ്ഥാനജനറല്‍ സെക്രട്ടറി പി.എം.എ.സലാം പറഞ്ഞു. മെയ് 15 വ്യാഴാഴ്ച വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

മാറാട് വിട്ടോടിപ്പോയവരില്‍ ഇതുവരെ ആത്മവിശ്വാസം നിറയ്ക്കാന്‍ സര്‍ക്കാരിന് കഴിഞ്ഞില്ല. ഒരു പള്ളിയില്‍ നിന്ന് ആയുധങ്ങള്‍ ലഭിച്ചതില്‍ നിന്നും തീവ്രവാദശക്തികള്‍ക്ക് എത്രത്തോളം സ്വാധീനമുണ്ടായിരുന്നുവെന്ന് തെളിയുന്നു. ഭരണത്തിലിരിക്കുന്ന രാഷ്ട്രീയപാര്‍ട്ടികളില്‍ പെട്ടവരാണ് കുറ്റവാളികളില്‍ അധികം പേരും എന്നതിനാലാണ് സര്‍ക്കാര്‍ ഉടന്‍ നടപടിയെടുക്കാന്‍ മടിച്ചത്. - സലാം ആരോപിച്ചു.

മതപരിഗണനയുള്‍പ്പെടെ എല്ലാ മുന്‍ഗണനകളും മാറ്റിവച്ച് മാറാട് കലാപത്തില്‍ കുറ്റവാളികളായവര്‍ക്ക് കര്‍ശനശിക്ഷ നല്കണമെന്ന് ഐഎന്‍എല്‍. എങ്കില്‍ മാത്രമേ ഇത്തരം സംഭവങ്ങള്‍ ആവര്‍ത്തിക്കാതിരിക്കൂ- സലാം ചൂണ്ടിക്കാട്ടി.

കുറ്റക്കാരായി കണ്ടെത്തുന്ന മുഴുവന്‍ പേരെയും മതപരിഗണനകള്‍ മാറ്റിവച്ച് കര്‍ശനമായി ശിക്ഷിയ്ക്കണം. സമാധാനം പുനസ്ഥാപിക്കാനുള്ള ഏക വഴി ഇത് മാത്രമാണ്. -സലാം പറഞ്ഞു.