പെപ്സിയെ സംരക്ഷിയ്ക്കും: ആന്റണി
തിരുവനന്തപുരം: കഞ്ചിക്കോട് വ്യവസായമേഖലയിലെ പെപ്സി ഫാക്ടറിയെ സംരക്ഷിക്കാന് എല്ലാ നടപടികളുമെടുക്കുമെന്ന് മുഖ്യമന്ത്രി. മെയ് 16 വെള്ളിയാഴ്ച പ്രസ് ക്ലബില് മീറ്റ് ദ പ്രസില് സംസാരിക്കുകയായിരുന്നു അദ്ദേഹം.
പെപ്സി കമ്പനിയുടെ ലൈസന്സ് റദ്ദാക്കാന് സിപിഎം നേതൃത്വത്തിലുള്ള പുതുശേരി പഞ്ചായത്ത് സമിതി തീരുമാനിച്ചതിന് പിന്നാലെയാണ് മുഖ്യമന്ത്രിയുടെ ഈ പ്രസ്താവന. വെള്ളം അമിതമായി ചൂഷണം ചെയ്യുന്നു എന്ന കാരണത്താലാണ് പെപ്സി കമ്പനിയുടെ ലൈസന്സ് റദ്ദാക്കാന് പഞ്ചായത്ത് സമിതി തീരുമാനിച്ചത്.
പെപ്സിയ്ക്ക് എല്ലാ നിയമസംരക്ഷണവും ഈ സര്ക്കാര് നല്കും. ബഹുരാഷ്ട്രക്കമ്പനികളുടെ ഉല്പന്നങ്ങള് ബഹിഷ്കരിക്കാന് ആഹ്വാനം ചെയ്യുന്ന സിപിഎം ഇരട്ടത്താപ്പ് നയം ഉപേക്ഷിക്കണം. എല്ഡിഎഫ് ഭരണകാലത്താണ് പെപ്സി പാലക്കാട് കമ്പനി സ്ഥാപിച്ചത്. ഇനി പെപ്സിയെ സംസ്ഥാനത്ത് നിന്ന് കെട്ടുകെട്ടിക്കാനുള്ള ശ്രമത്തെ ഞങ്ങള് സഹായിയ്ക്കില്ല. - ആന്റണി വ്യക്തമാക്കി.
സിപിഎം ഭരിയ്ക്കുന്ന ബംഗാളില് മൂന്ന് പെപ്സി യൂണിറ്റുകള് ഉണ്ട്. രണ്ട് കോക്ക കോള കമ്പനികളും ഉണ്ട്. ബംഗാളില് ഈ കമ്പനികളെ അനുവദിക്കുമ്പോള് ഇവിടെ എതിര്ക്കുക വഴി സിപിഎം സംസ്ഥാനത്തിന്റെ വികസനത്തിന് എതിര് നില്ക്കുകയാണ്. - ആന്റണി പറഞ്ഞു.
കമ്പനി കൂടുതലായി വെള്ളം ചൂഷണം ചെയ്യുന്നു എന്ന ആരോപണം പെപ്സി കമ്പനി അധികൃതര് വെള്ളിയാഴ്ച വാര്ത്താക്കുറിപ്പില് നിഷേധിച്ചു. ബന്ധപ്പെട്ട സര്ക്കാര് വകുപ്പിന്റെ സര്വേയ്ക്ക് ശേഷമാണ് പാലക്കാട് തങ്ങള് യൂണിറ്റ് ആരംഭിച്ചതെന്നും പെപ്സി അധികൃതര് പറഞ്ഞു.