ജി.പി. പിള്ളയുടെ ചരമശതാബ്ദി ആഘോഷിക്കും

തിരുവനന്തപുരം: ബാരിസ്റര്‍ ജി.പി. പിള്ളയുടെ ചരമശതാബ്ദി ആഘോഷിയ്ക്കാന്‍ കേരള കൗണ്‍സില്‍ ഓഫ് ഹിസ്റോറിക്കല്‍ റിസര്‍ച്ച്(കെസിഎച്ച്ആര്‍) തീരുമാനിച്ചു. ഒരു വര്‍ഷം നീണ്ടു നില്ക്കുന്ന ആഘോഷപരിപാടികളാണ് ആസൂത്രണം ചെയ്തിരിക്കുന്നത്.

തെക്കന്‍ കേരളത്തില്‍ സ്വാതന്ത്രസമരപ്പോരാട്ടത്തിലും പത്രപ്രവര്‍ത്തനത്തിലും സജീവസാന്നിധ്യമായിരുന്നു ബാരിസ്റര്‍ ജി.പി. പിള്ള. മെയ് 28ന് നടക്കുന്ന ബാരിസ്റര്‍ പിള്ള അനുസ്മരണച്ചടങ്ങ് ഫ്രണ്ട് ലൈന്‍ എഡിറ്റര്‍ എന്‍. റാം ഉദ്ഘാടനം ചെയ്യും. പത്രപ്രവര്‍ത്തകന്‍ ടി.ജെ.എസ്. ജോര്‍ജ്ജ് മുഖ്യപ്രഭാഷണം നടത്തും.

കേരളത്തിലെ സ്വാതന്ത്യ്രസമരത്തിന്റെ ആദ്യഘട്ടങ്ങളെക്കുറിച്ച് ഒരു സെമിനാര്‍ സംഘടിപ്പിയ്ക്കാനും തീരുമാനിച്ചിട്ടുണ്ട്. പിള്ളയുടെ രചനകള്‍ ശേഖരിച്ച് പ്രസിദ്ധീകരിക്കും. പിള്ളയുടെ ജീവചരിത്രം തയ്യാറാക്കും.

മലയാളി മെമ്മോറിയല്‍, ഈഴവ മെമ്മോറിയല്‍ സമരങ്ങള്‍ക്ക് പിന്നില്‍ പിള്ളയായിരുന്നു പ്രവര്‍ത്തിച്ചത്. മദ്രാസ് സ്റാന്‍ഡേര്‍ഡ്, വെസ്റേണ്‍ സ്റാര്‍ എന്നീ പത്രങ്ങളില്‍ പ്രവര്‍ത്തിച്ചിട്ടുണ്ട്.