കുഞ്ഞാലിക്കുട്ടിയും പൂര്‍ണ്ണിമയും ഉടക്കി

തിരുവനന്തപുരം: ദേശീയ വനിതാകമ്മീഷന്‍ ചെയര്‍ പേഴ്സണ്‍ പൂര്‍ണ്ണിമാ അദ്വാനിയും മന്ത്രി കുഞ്ഞാലിക്കുട്ടിയും ഉടക്കി. മെയ് 20 ചൊവാഴ്ചയായിരുന്നു ഇരുവരും തമ്മില്‍ ഉരസിയത്.

ആദിവാസി നേതാവ് ജാനുവിനെ വനിതാകമ്മീഷന്‍ സെമിനാറില്‍ പങ്കെടുക്കുന്നതില്‍ നിന്നും പൊലീസ് തടഞ്ഞതിനെച്ചൊല്ലിയായിരുന്നു തര്‍ക്കം. സെമിനാറിന്റെ വേദിയില്‍ വച്ചായിരുന്നു ഇത്. ജാനുവിനെ പൊലീസ് തടഞ്ഞ നടപടിയെ പൂര്‍ണ്ണിമാ അദ്വാനി എതിര്‍ത്തിരുന്നു. എന്നാല്‍ ഈ പ്രശ്നത്തില്‍ നിങ്ങള്‍ ഇടപെടേണ്ടെന്ന കുഞ്ഞാലിക്കുട്ടിയുടെ പ്രസ്താവന പൂര്‍ണ്ണിമയെ ചൊടിപ്പിച്ചു.

ഈ സെമിനാര്‍ സംഘടിപ്പിക്കുന്നത് ദേശീയ വനിതാകമ്മീഷനാണെന്നും ഇതില്‍ ഏത് സ്ത്രീകള്‍ക്കും പങ്കെടുക്കാമെന്നും പൂര്‍ണ്ണിമ അദ്വാനി മറുപടി നല്കിയപ്പോള്‍ കുഞ്ഞാലിക്കുട്ടി പിന്നെയൊന്നും സംസാരിച്ചില്ല. നേരത്തെ മുത്തങ്ങയില്‍ ആദിവാസി സ്ത്രീകളെ പൊലീസ് ലൈംഗികമായി പീഡിപ്പിച്ചുവെന്ന പൂര്‍ണ്ണിമാ അദ്വാനിയുടെ പ്രസ്താവനയും സംസ്ഥാന സര്‍ക്കാരിന് തലവേദനയായിരിക്കുകയാണ്.