ഹുണ്ടായിയുടെ സാന്‍ട്രോ ക്സിംഗ്വിപണിയില്‍

ചെന്നൈ: ഹുണ്ടായി മോട്ടോര്‍ ഇന്ത്യ പുതിയ മോഡലായ സാന്‍ട്രോ ക്സിംഗ് ചെന്നൈ വിപണിയിലിറക്കി.

കഴിഞ്ഞ മൂന്ന് വര്‍ഷമായി കമ്പനിയുടെ ഏറ്റവും കൂടുതല്‍ വിറ്റഴിക്കപ്പെടുന്ന മോഡല്‍ സാന്‍ട്രോ ആണെന്ന് ഹുണ്ടായി മോട്ടോര്‍ ഇന്ത്യ ലിമിറ്റഡ് ബി. വി. ആര്‍. സുബു പറഞ്ഞു.

സാന്‍ട്രോ സിപ് പ്ലസിന് ചില മാറ്റങ്ങള്‍ വരുത്തിയതാണ് ഈ പുതിയ കാര്‍ അതുകൊണ്ട് തന്നെ ഈ കാറിന്റെ വില സിപ് പ്ലസിന്റേത് തന്നെ ആയിരിയ്ക്കും. ഇപ്പോള്‍ സിപ് പ്ലസ് കാറിന് ദില്ലി വിപണിയിലെ വില 3,29,721 രൂപയ്ക്കും 4,30,555 രൂപയ്ക്കും ഇടയിലാണ്. മറ്റ് നഗരങ്ങളില്‍ വിലയില്‍ ചെറിയ ഏറ്റക്കുറച്ചിലുകള്‍ ഉണ്ടാവും.

കമ്പനിയുടെ എക്സിക്യൂട്ടീവ് ഡയറക്ടര്‍ ബി. ജി. ലീ, ഡെപ്യൂട്ടി മാനേജിംഗ് ഡയറക്ടര്‍ എസ്. ഡബ്ല്യു. ക്വോണ്‍ എന്നിവര്‍ പുതിയ മോഡലിന്റെ സവിശേഷതകള്‍ വിശദീകരിച്ചു.

രാജ്യത്തെ രണ്ടാമത്തെ വലിയ കാര്‍ നിര്‍മാതാക്കളാണ് ഹുണ്ടായി. 1998 ഒക്ടോബറില്‍ ഉത്പാദനം തുടങ്ങിയതു മുതലുള്ള 55 മാസക്കാലയളവില്‍ നാല് ലക്ഷത്തിലേറെ കാറുകളാണ് വിറ്റത്.