ഐടി വിദഗ്ധര്ക്ക് വീസ നിയന്ത്രണമുണ്ടായേക്കും
ബാംഗ്ലൂര്: യൂറോപ്യന് രാഷ്ട്രങ്ങളിലേക്കും യുഎസിലേക്കും ഐടി വിദഗ്ധര്ക്ക് കൂടുതല് വീസ നിയന്ത്രണം ഏര്പ്പെടുത്തിയേക്കുമെന്ന് സോഫ്റ്റ്വെയര്, സര്വീസസ് കമ്പനികളുടെ ദേശീയ സംഘടനയായ നാസ്കോം ഭയപ്പെടുന്നു.
പ്രധാനമായും സാമ്പത്തികരംഗത്തെ പ്രതിസന്ധി മൂലമാണ് യൂറോപ്യന് രാഷ്ട്രങ്ങളും യുഎസും മറ്റ് രാജ്യങ്ങളില് നിന്നുള്ള ഐടി വിദഗ്ധര്ക്കുള്ള വീസ നിയന്ത്രണം കര്ശനമാക്കുക. ആഗോള സാമ്പത്തികനില പ്രതിസന്ധിയിലാണ്. തൊഴിലവസരങ്ങളുടെ കാര്യത്തിലും ഈ പ്രതിസന്ധിയുണ്ട്. അതിനാല് വികസിത രാഷ്ട്രങ്ങള് നിയന്ത്രണങ്ങള് കൊണ്ടുവന്നേയ്ക്കും- നാസ്കോം പ്രസിഡന്റ് കിരണ് കാര്നിക് പറഞ്ഞു.
അതേ സമയം സൂരക്ഷയുടെയോ വീസാനടപടിക്രമങ്ങള്ക്കുള്ള കാലതാമസത്തിന്റേയോ ഒക്കെ കാരണം പറഞ്ഞ് വിസ നിയന്ത്രണം ഏര്പ്പെടുത്തുന്നത് സോഫ്റ്റ്വെയര് വ്യവസായത്തിന് ഗുണകരമാവില്ലെന്നും കാര്നിക് സൂചിപ്പിച്ചു. യൂറോപ്പിലേയും യുഎസിലെയും കമ്പനികള് ജോലികള് ഔട്ട് സോഴ്സ് ചെയ്യുന്നുണ്ടെങ്കിലും 40 ശതമാനം ജോലികളും അതത് രാജ്യങ്ങളിലെ കമ്പനികളില് തന്നെയാണ് ചെയ്യേണ്ടിവരിക. അതിനാല് ജീവനക്കാര്ക്ക് സുഗമമായി വന്നുപോകാന് കഴിഞ്ഞില്ലെങ്കില് അത് സോഫ്റ്റ്വെയര് വ്യവസായത്തെ ബാധിയ്ക്കും.- കാര്ണിക് ചൂണ്ടിക്കാട്ടി.
എല്-1 വിസയില് മറ്റ്രാജ്യങ്ങളില് നിന്ന് ജീവനക്കാരെ യുഎസിലേക്ക് കൊണ്ടുപോകുന്നതില് നിന്നും കമ്പനികളെ തടഞ്ഞുകൊണ്ടുള്ള ഒരു ബില്ലിന് യുഎസ് പ്രതിനിധിസഭ പാസാക്കിയിരുന്നു. ഈ ബില്ല് ഒട്ടേറെ കമ്പനികളുടെ പ്രവര്ത്തനത്തെ ബാധിച്ചിട്ടുണ്ട്. സാധാരണ മറ്റ് രാജ്യങ്ങളില് ശാഖകളുള്ള യുഎസിലെ ഒരു കമ്പനിയ്ക്ക് യുഎസിലേക്ക് പുറം രാജ്യങ്ങളില് നിന്ന് ഒരു ജീവനക്കാരനെ കൊണ്ടുവരാന് എല്-1 വിസ മതിയായിരുന്നു. കമ്പനിയുടെ ഒരു ശാഖയില് നിന്നും മറ്റൊരു ശാഖയിലേക്കുള്ള സ്ഥലമാറ്റം എന്ന നിലയിലാണ് ഇതിനെ കണക്കാക്കിയിരിക്കുന്നത്. എന്നാല് പുതിയ നിയമനിര്മ്മാണം കമ്പനികളുടെ ഈ സ്വാതന്ത്യ്രം ഇല്ലാതാക്കിയിരിക്കുകയാണ്.
രണ്ട് രാഷ്ട്രങ്ങള്ക്കിടയിലുള്ള വീസ നിയമങ്ങള് പരമാവധി ലളിതമാക്കാന് സര്ക്കാരുമായി ചേര്ന്ന് പ്രവര്ത്തിക്കുകയാണ് നാസ്കോമെന്ന് കാര്ണിക് പറഞ്ഞു. ചര്ച്ചകള് നടക്കുന്നുണ്ടെങ്കിലും എല്ലാം വളരെ സാവധാനത്തിലേ മുന്നോട്ടു പോകുന്നുള്ളൂവെന്നും കാര്ണിക് പറഞ്ഞു.