സമാധാനശ്രമത്തോട് സഹകരിക്കണം

കൊച്ചി: മാറാട്ട് സ്ഥായിയായ സമാധാനമുണ്ടാക്കുന്നതിനും സംസ്ഥാനത്ത് സാമുദായിക സൗഹാര്‍ദം കൈവരിക്കുന്നതിനും സര്‍ക്കാര്‍ നടത്തുന്ന ശ്രമങ്ങളോട് ജനങ്ങള്‍ സഹകരിക്കണമന്ന് മുഖ്യമന്ത്രി എ. കെ. ആന്റണി ആവശ്യപ്പെട്ടു.

രാഷ്ട്രീയപാര്‍ട്ടികളടക്കം എല്ലാ വിഭാഗങ്ങളുമായി ഒന്നുചേര്‍ന്ന് സംസ്ഥാനത്തെ സൗഹാര്‍ദാന്തരീക്ഷം നിലനിര്‍ത്താനുള്ള ശ്രമത്തിലാണ് സര്‍ക്കാര്‍.

അങ്ങേയറ്റം മനുഷ്യത്വഹീനമായ സംഭവമാണ് മാറാട് അരങ്ങേറിയത്. കൊല നടത്തിയവരെ എത്രയും പെട്ടെന്ന് പിടികൂടും.

വൈരാഗ്യവും പ്രതികാരവും സര്‍ക്കാര്‍ നടത്തുന്ന വികസന പ്രവര്‍ത്തനങ്ങളെ ബാധിക്കും. ഇത് സംസ്ഥാനത്തിന് ദോഷകരമായ ഫലമാണ് ചെയ്യുക.

മുഖ്യമന്ത്രി മാത്രം മാറാട് സന്ദര്‍ശിച്ചാല്‍ മതിയെന്ന് യു ഡി എഫ് തീരുമാനിച്ചിരുന്നതിനാലാണ് മറ്റ് മന്ത്രിമാര്‍ സന്ദര്‍ശനവേളയില്‍ തന്നെ അനുഗമിക്കാതിരുന്നത്.

മാറാട്ടെ പള്ളി വഖഫ് ബോര്‍ഡിന് കൈമാറണമെന്ന മുസ്ലിം ലീഗിന്റെ ആവശ്യത്തെ കുറിച്ച് ചോദിച്ചപ്പോള്‍ അക്കാര്യം ജില്ലാ അധികൃതരും പൊലീസുമാണ് തീരുമാനിക്കേണ്ടതെന്ന് ആന്റണി പറഞ്ഞു.

മാറാട് സംഭവത്തെ കുറിച്ച് ചര്‍ച്ച ചെയ്യുന്നതിന് സര്‍വകക്ഷി യോഗം വിളിക്കുന്നത് സംബന്ധിച്ച് സര്‍ക്കാര്‍ പരിശോധിച്ചുവരികയാണെന്ന് മുഖ്യമന്ത്രി പറഞ്ഞു.