എഞ്ചി. വാര്ഷിക ഫീസ് 36,000 രൂപ
തിരുവനന്തപുരം: സംസ്ഥാനത്തെ 56 എഞ്ചിനീയറിംഗ് കോളജുകളില് വിദ്യാര്ഥികള്ക്കുള്ള വാര്ഷിക ഫീസ് 36,000 രൂപയാക്കാന് മന്ത്രിസഭാ യോഗം തീരുമാനിച്ചു.
നിലവിലുള്ള കുറഞ്ഞ തോതിലുള്ള ഫീസ് നിലവിലുള്ള 11 സ്ഥാപനങ്ങളിലും മൂന്ന് എയ്ഡഡ് എഞ്ചിനീയറിംഗ് കോളജുകളിലും മാത്രമായിരിക്കും. സ്വാശ്രയ കോളജുകളിലെ 13,000ലേറെ എഞ്ചിനീയറിംഗ് സീറ്റുകളില് 36,000 രൂപയായിരിക്കും ഇനി ഫീസ്. കുറഞ്ഞ ഫീസുള്ള നാലായിരത്തോളം സീറ്റുകള് മാത്രമാണ് നിലവിലുള്ളത്.
എല് ബി എസ്, ഐഎച്ച്ആര്ഡി തുടങ്ങിയവ നടത്തുന്ന സ്വാശ്രയ എഞ്ചിനിയീറിംഗ് സ്ഥാപനങ്ങളിലും ഫീസ് കൂടും. സ്വാശ്രയ കോളജുകളില് വിദ്യാര്ഥികളില് നിന്ന് 2000 രൂപ പ്രത്യേക ഫീസായി ഈടാക്കും. 50,000നും ഒരു ലക്ഷത്തിനുമിടയില് വരുന്ന തുക തിരിച്ചുനല്കുന്ന ഡെപ്പോസിറ്റായി വിദ്യാര്ഥികളില് നിന്ന് സ്വീകരിക്കും. സര്ക്കാര് ക്വാട്ടയില് പ്രവേശനം നല്കുന്ന വിദ്യാര്ഥികള് ഇത് നല്കേണ്ടതില്ല. ഡെപ്പോസിറ്റ് സ്വീകരിക്കണോ വേണ്ടയോ എന്ന് തീരുമാനിക്കേണ്ടത് മാനേജ്മെന്റുകളാണ്.
സ്വാശ്രയകോളജുകളിലെ മാനേജ്മെന്റ് ക്വാട്ടയില് 50 ശതമാനം സീറ്റുകളിലേക്ക് മാനേജ്മെന്റ് നടത്തുന്ന പരീക്ഷയുടെ അടിസ്ഥാനത്തിലായിരിക്കും പ്രവേശനം നല്കുന്നത്. എല് ബി എസ്, ഐ എച്ച് ആര്ഡി എന്നിവ നടത്തുന്ന സ്ഥാപനങ്ങളില് അമ്പത് ശതമാനം സീറ്റുകളിലേക്ക് സ്ഥാപനങ്ങളിലെ കോളജ് പ്രിന്സിപ്പില്മാര് നടത്തുന്ന പ്രവേശന പരീക്ഷയുടെ അടിസ്ഥാനത്തിലായിരിക്കും പ്രവേശനം നല്കുന്നത്.