തോമസ്-പത്മജ പ്രശ്നം ഹൈക്കമാന്റിന് മുന്നില്‍

തിരുവനന്തപുരം: വിനോദസഞ്ചാര മന്ത്രി കെ. വി. തോമസും വിനോദ സഞ്ചാര വികസന കോര്‍പ്പറേഷന്‍ ചെയര്‍പേഴ്സണ്‍ പത്മജ വേണുഗോപാലും തമ്മിലുള്ള തര്‍ക്കം ഹൈക്കമാന്റിന് മുന്നിലേക്ക്.

ദില്ലിയിലേക്ക് തിരിച്ച കെ. വി. തോമസ് ഐ ഗ്രൂപ്പ് തന്നെ ഒതുക്കാന്‍ ശ്രമിക്കുകയാണെന്ന പരാതി സോണിയയെ അറിയിക്കും. അതേ സമയം തോമസ് കെ ടി ഡി സിയുമായി നിസ്സഹകരിക്കുന്നുവെന്ന് ചൂണ്ടിക്കാട്ടി പത്മജ സോണിയയ്ക്ക് ഫാക്സ് സന്ദേശമയച്ചു.

പത്മജ തോമസിനെതിരെ പരസ്യ പ്രസ്താവനയുമായി രംഗത്തു വന്നതോടെ ഒരിക്കല്‍ കൂടി കേരളത്തിലെ കോണ്‍ഗ്രസിനകത്തെ പ്രശ്നങ്ങള്‍ ഹൈക്കമാന്റിന് മുന്നിലെത്തുകയാണ്. രാജ്യസഭാ തിരഞ്ഞെടുപ്പിനെ ചൊല്ലിയുണ്ടായ പ്രതിസന്ധി ഒരു വിധം ഒത്തുതീര്‍ത്ത ഹൈക്കമാന്റിന് ഐ ഗ്രൂപ്പിനകത്ത് തന്നെയുണ്ടായ പോരിനെ തുടര്‍ന്നുണ്ടായ തര്‍ക്കങ്ങളെയാണ് നേരിടാനുള്ളത്.

രാജ്യസഭാ തിരഞ്ഞെടുപ്പില്‍ വിമത സ്ഥാനാര്‍ഥിക്ക് വോട്ട് ചെയ്യാതിരിക്കുകയും ഗ്രൂപ്പ് പ്രതിനിധിയെന്ന നിലയില്‍ മന്ത്രിയായ ശേഷം ഗ്രൂപ്പിനെ തള്ളിപ്പറയുകയും ചെയ്ത തോമസിനെ ഒതുക്കിയേ തീരൂവെന്ന വാശിയിലാണ് ഐ ഗ്രൂപ്പ്. ഇതിനായുള്ള കരുനീക്കങ്ങളുടെ ഭാഗമായാണ് തോമസിനെതിരായ പരാതിയുമായി പത്മജ പരസ്യമായി രംഗത്തെത്തിയത്.

പ്രശ്നം മുഖ്യമന്ത്രി കൈകാര്യം ചെയ്യട്ടെയെന്നാണ് കെ പി സി സി പ്രസിഡന്റ് കെ. മുരളീധരന്‍ പറയുന്നത്. തോമസിനെ രാഷ്ട്രീയമായി തകര്‍ക്കുക എന്ന ലക്ഷ്യത്തോടെ ഐ ഗ്രൂപ്പ് കരുക്കള്‍ നീക്കുമ്പോള്‍ മുഖ്യമന്ത്രിക്ക് കൈകാര്യം ചെയ്യാവുന്നതിനപ്പുറത്തുള്ള പ്രശ്നമായി തീരുകയാണ് ഇത്.