എക്സ്പ്രസ് ദിനപ്പത്രം പൂട്ടാന്‍ ഉത്തരവ്

കൊച്ചി: പുറത്തിറങ്ങാത്ത തൃശൂരിലെ എക്സ്പ്രസ് ദിനപ്പത്രത്തിന്റെ പ്രസാധകരായ എക്സ്പ്രസ് മലയാളം പ്രൈവറ്റ് ലിമിറ്റഡ് എന്ന കമ്പനി പൂട്ടാന്‍ ഹൈ കോടതി ഉത്തരവായി.

കോടതി ഔദ്യോഗിക ലിക്യിഡേറ്ററേയും നിയമിച്ചിട്ടുണ്ട്. കമ്പനിയുടെ ആസ്തികളും മറ്റും എത്രയും പെട്ടെന്ന് ഏറ്റെടുക്കാന്‍ ജസ്റിസ് ആര്‍ രാജേന്ദ്ര ബാബു ലിക്യിഡേറ്റര്‍ക്ക് നിര്‍ദ്ദേശം നല്‍കി.

ലോഡ് കൃഷ്ണാ ബാങ്ക് നല്‍കിയ ഹര്‍ജ്ജിയിലാണ് കോടതി ഈ വിധി പുറപ്പെടുവിച്ചത്. ബാങ്കില്‍ നിന്ന് എടുത്ത 49 ലക്ഷം രൂപയുടെ കടം വീടാന്‍ കമ്പനിയ്ക്ക കഴിയുന്നില്ലെന്ന് കാണിച്ചാണ് ബാങ്ക് ഹര്‍ജ്ജി നല്‍കിയിരുന്നത്. കമ്പനിയ്ക്ക് കടം വീടാന്‍ കഴിയില്ലെന്ന് കോടതിയ്ക്ക് ബോദ്ധ്യമായി. ഇതിനെ തുടര്‍ന്നാണ് അടച്ച് പൂട്ടാന്‍ കോടതി ഉത്തരവിട്ടത്.

ഒരുകാലത്ത് തൃശൂരിലെ പ്രധാന ദിനപ്പത്രമായിരുന്നു എക്സ്പ്രസ്. തുടര്‍ന്ന് സാമ്പത്തിക പ്രശ്നം ഉണ്ടായതിനെ തുടര്‍ന്ന് നായര്‍ സര്‍വീസ് സൊസൈറ്റി ഈ കമ്പനിയില്‍ പണം നിക്ഷേപിച്ചിരുന്നു. എന്നിട്ടും കമ്പനിയ്ക്ക് ഗുണം ഉണ്ടായില്ല. പത്രം നല്ല രീതിയില്‍ പുറത്തിറങ്ങിയുമില്ല. അതിന് ശേഷം കേന്ദ്രമന്ത്രിയായിരുന്ന സുബ്രഹ്മണ്യം സ്വാമി പത്രത്തിന്റെ പ്രധാന ഓഹരി വാങ്ങിയിരുന്നു. തുടര്‍ന്ന് കുറച്ച് കാലം പത്രം പുറത്തിറങ്ങിയെങ്കിലും വീണ്ടും നിന്നു.