സാമ്പത്തിക സംവരണം നല്ല നീക്കം: പിഎംകെ

ചെന്നൈ: മുന്നോക്കവിഭാഗത്തിലെ സാമ്പത്തികമായി പിന്നോക്കം നില്‍ക്കുന്നവര്‍ക്ക് സംവരണം ഏര്‍പ്പെടുത്താനുള്ള ബിജെപി തീരുമാനത്തെ പിഎംകെ സ്വാഗതം ചെയ്തു.

എന്നാല്‍ സാമ്പത്തിക സംവരണം മറ്റ് പിന്നോക്ക ജാതികള്‍ക്കും ദളിതുകള്‍ക്കുമുള്ള സംവരണത്തെ ഒരു തരത്തിലും ബാധിക്കരുതെന്ന് പിഎംകെ നേതാവ് ഡോ. എസ്. രാംദാസ് പറഞ്ഞു.

സാമ്പത്തിക മാനദണ്ഡത്തിന്റെ അടിസ്ഥാനത്തില്‍ സംവരണം ഏര്‍പ്പെടുത്തുന്നതിന് ഭരണഘടനാ ഭേദഗതി കൊണ്ടുവരേണ്ടതുണ്ട്. ഓരോ സമുദായത്തിന്റെയും ജനസംഖ്യയുടെ അടിസ്ഥാനത്തില്‍ സംവരണം ഏര്‍പ്പെടുത്തുന്നത് സാമൂഹ്യനീതിക്ക് വേണ്ടിയുള്ള പോരാട്ടത്തിന്റെ വിജയമായിരിക്കും.

തമിഴ്നാടിന്റെ സാമ്പത്തിക നില മെച്ചപ്പെട്ട സ്ഥിതിയിലെത്തിച്ചുവെന്ന് മുഖ്യമന്ത്രി ജയലളിത ഈയിടെ അവകാശപ്പെട്ട സാഹചര്യത്തില്‍ സാമ്പത്തിക സ്ഥിതിയെ കുറിച്ച് ഒരു ധവളപത്രം പുറപ്പെടുവിക്കണമെന്ന് രാംദാസ് ആവശ്യപ്പെട്ടു.