മൂന്ന് നേതാക്കള്‍ സി പി എം വിട്ടു

കൊല്ലം: ജില്ലയിലെ മൂന്ന് സി പി എം നേതാക്കള്‍ പാര്‍ട്ടി വിട്ടതായി വാര്‍ത്താ സമ്മേളനത്തില്‍ അറിയിച്ചു. ട്രേഡ് യൂണിയന്‍ നേതാവ് വി. ബി. ചെറിയാന്‍ സാന്നിധ്യത്തിലായിരുന്നു പ്രഖ്യാപനം.

സി പി എം മുന്‍ ജില്ലാ സെക്രട്ടറിയും സി ഐ ടി യു ജോയിന്റ് സെക്രട്ടറിയുമായ കെ. പി. വിശ്വവത്സലന്‍, ചാത്തന്നൂര്‍ ലോക്കല്‍ കമ്മിറ്റി അംഗം പി. ഗംഗാധരന്‍പിള്ള, അഖിലേന്ത്യാ ജനാധിപത്യ മഹിളാ അസോസിയേഷന്‍ മുന്‍ ജില്ലാ സെക്രട്ടറി കൃഷ്ണമ്മാള്‍ എന്നിവരാണ് സി പി എം വിടാനുള്ള തീരുമാനം അറിയിച്ചത്. വി. ബി. ചെറിയാന്റെ നേതൃത്വത്തിലുള്ള പ്രവര്‍ത്തനങ്ങളുമായി സഹകരിക്കുമെന്ന് അവര്‍ പറഞ്ഞു.

അടിയന്തിരാവസ്ഥ കാലത്ത് സി പി എം കൊല്ലം ജില്ലാ ആക്ടിംഗ് സെക്രട്ടറിയായിരുന്നു വിശ്വവത്സലന്‍. അവസാനത്തെ പാര്‍ട്ടി സമ്മേളനത്തില്‍ വിശ്വവത്സലനെ ജില്ലാ കമ്മിറ്റിയില്‍ നിന്ന് ഒഴിവാക്കി ചവറ ഏരിയാ കമ്മിറ്റിയില്‍ ഉള്‍പ്പെടുത്തുകയായിരുന്നു. സി ഐ ടി യു വിഭാഗത്തിന്റെ പ്രമുഖ വക്താവാണ് വിശ്വവത്സലന്‍.

സി പി എമ്മിന്റെ ജില്ലയിലെ മുതിര്‍ന്ന നേതാക്കളിലൊരാളായിരുന്നു ഗംഗാധരന്‍പിള്ള. കൃഷ്ണമ്മാള്‍ വിളക്കുടി ലോക്കല്‍ കമ്മിറ്റി സെക്രട്ടറിയായിയിരുന്നിട്ടുണ്ട്.

നേരത്തെ പാര്‍ട്ടിയില്‍ നിന്ന് രാജിവച്ച കടക്കല്‍ സുന്ദരേശന്‍, രമണന്‍, രാജദാസ് എന്നിവരും ചെറിയാനോടൊപ്പം പ്രവര്‍ത്തിക്കാനുള്ള തീരുമാനം അറിയിച്ചു. സി ഐ ടി യു നേതൃത്വത്തിലുള്ള കശുവണ്ടി തൊഴിലാളി കേന്ദ്രത്തിന്റെ സംസ്ഥാന പ്രസിഡന്റാണ് സുന്ദരേശന്‍. മൂന്ന് പേരും സി പി എം ചടയമംഗലം ഏരിയാ കമ്മിറ്റിയിലെ നേതാക്കളായിരുന്നു.