നഴ്സ് റിക്രൂട്ട്മെന്റ്: 5 പേര്‍ പിടിയില്‍

കൊച്ചി: ശരിയായ രേഖകളില്ലാതെ യുഎസിലേക്ക് നഴ്സ്മാരെ റിക്രൂട്ട് ചെയ്യാന്‍ ശ്രമിച്ച അഞ്ച് പേര്‍ പൊലീസ് പിടിയിലായി. ഇതില്‍ ഒരാള്‍ മലയാളിയാണ്.

ഒറ്റപ്പാലം മനിശേരി പാഴുന്നന വീട്ടില്‍ പി.കെ. തോമസ് എന്നയാളാണ് മലയാളി. സെക്കന്ദരാബാദിലുള്ള രമ്യ(24), ഹൈദരാബാദിലുള്ള എന്‍.എസ്. രവികുമാര്‍(33), കാഞ്ചുകോട്ടാവരിയിലുള്ള സി.കെ. ചൈതന്യ(25), വിജയവാഡയിലെ മാരുതി നഗറിലുള്ള എന്‍.വി.എസ്. റാം (26) എന്നിവരാണ് പിടിയിലായ മറ്റ് നാല് പേര്‍.

യുഎസിലേക്ക് നഴ്സ്മാരെ റിക്രൂട്ട് ചെയ്യാന്‍ എറണാകുളത്തെ പെന്റ മേനകയില്‍ ഇന്റര്‍വ്യൂ നടക്കുമെന്ന് അഞ്ചു ദിവസം മുമ്പ് പത്രത്തില്‍ പരസ്യം നല്കിയിരുന്നു. ഏജന്‍സി നഴ്സ്മാര്‍ക്ക് ഫ്രീ വിസ നല്കുമെന്നും പരസ്യത്തിലുണ്ടായിരുന്നു.

സംസ്ഥാനത്തിന്റെ വിവിധ ഭാഗങ്ങളില്‍ നിന്നായി 400 നഴ്സ്മാര്‍ ഇന്റര്‍വ്യൂവിനെത്തി. പത്രപരസ്യത്തോടൊപ്പം നല്കിയ മൊബൈല്‍ ഫോണ്‍ നമ്പറില്‍ വിളിച്ചാണ് എല്ലാവരും ഇന്റര്‍വ്യൂവിനുള്ള സമയം നിശ്ചയിച്ചത്.

പെന്റ മേനകയില്‍ മുറി ബുക്ക് ചെയ്തിരുന്നത് തലേദിവസം മാത്രമാണ്. തിരഞ്ഞെടുക്കപ്പെടാന്‍ 40,000 രൂപ മുതല്‍ മൂന്ന് ലക്ഷം രൂപ വരെയാണ് ഇവര്‍ ഉദ്യോഗാര്‍ത്ഥികളോട് ആവശ്യപ്പെട്ടത്.

ഇന്റര്‍വ്യൂവിനെത്തിയവരോട് 10 ചോദ്യങ്ങള്‍ ചോദിച്ചു. ഇതില്‍ നാല് ശരിയുത്തരം പറഞ്ഞവര്‍ക്കും ജോലി വാഗ്ദാനം ചെയ്തു. പക്ഷെ ഇത്രയും വലിയ തുക ചോദിച്ചപ്പോള്‍ ഉദ്യോഗാര്‍ത്ഥികളില്‍ ചിലര്‍ അതിനെ ചോദ്യം ചെയ്തു. പരസ്യത്തില്‍ സൗജന്യമായി വിസ നല്കാമെന്നാണ് വാഗ്ദാനം ചെയ്തിരുന്നതെന്നും ഇപ്പോള്‍ തിരഞ്ഞെടുക്കപ്പെടാന്‍ പണം ചോദിക്കുന്നത് ശരിയല്ലെന്നും ചില ഉദ്യോഗാര്‍ത്ഥികള്‍ വാദിച്ചു.

തര്‍ക്കത്തെതുടര്‍ന്ന് ചിലര്‍ പൊലീസിനെ സമീപിച്ചു. അന്വേഷണത്തില്‍ റിക്രൂട്ട്മെന്റ് ഏജന്‍സി വ്യാജന്മാരാണെന്ന് തെളിഞ്ഞു.