ഇന്ത്യയിലേക്ക് തൊഴിലവസരങ്ങള്‍ ഒഴുകുന്നു

ലണ്ടന്‍: ബ്രിട്ടനില്‍ നിന്നും ഇന്ത്യയിലേക്ക് തൊഴിലവസരങ്ങള്‍ ഒഴുകുന്നു. ബ്രിട്ടനിലെ ബാങ്കുകളും ഇന്‍ഷ്വറന്‍സ് കമ്പനികളുമാണ് പ്രധാനമായും അവരുടെ തൊഴിലവസരങ്ങള്‍ ഇന്ത്യയിലേക്ക് കൊണ്ടുവരാന്‍ ആലോചിക്കുന്നത്.

ക്ലെറിക്കല്‍, പ്രോസസിംഗ് മേഖലകളിലായി രണ്ട് ലക്ഷം തൊഴിലവസരങ്ങള്‍ ഇന്ത്യയിലേക്ക് വരുംനാളുകളില്‍ ഒഴുകുമെന്നാണ് കണക്ക്. 2008ഓടെ കാള്‍ സെന്റര്‍ മേഖലയില്‍ മാത്രമായി ഇന്ത്യയിലേക്ക് ഒരു ലക്ഷം തൊഴിലവസരങ്ങള്‍ എത്തുമെന്ന് അഡെക്കോ എന്ന റിക്രൂട്ട്മെന്റ് ഏജന്‍സി പ്രവചിക്കുന്നു. ബ്രിട്ടനിലെ ട്രേഡ്യൂണിയനുകള്‍ ഇതിനെതിരെ സമരരംഗത്തുണ്ട്.

ബാര്‍ക്ലെയ്സ്, ലോയ്ഡ്സ്, ടിഎസ്ബി, പ്രൂഡന്‍ഷ്യല്‍ എന്നിവര്‍ ഇന്ത്യയിലേക്ക് ഓഫീസുകള്‍ തുറക്കാനും കൂടുതല്‍ തൊഴിലവസരങ്ങള്‍ ഇന്ത്യയിലേക്ക് കൊണ്ടുവരാനും ആലോചിക്കുന്നു. ഇതുവഴി കോടികള്‍ ലാഭിയ്ക്കാനാവുമെന്നാണ് ഈ കമ്പനികളുടെ കണക്കുകൂട്ടല്‍. 2003 അവസാനത്തോടെ എച്ച്എസ്ബിസി 3,600 തൊഴിലവസരങ്ങള്‍ കൂടി ഇന്ത്യയിലേക്ക് കൊണ്ടുവരും.