ധാതുമണല്‍ ഖനനം വേണ്ട: കെപിസിസി

തിരുവനന്തപുരം: ആലപ്പുഴജില്ലയിലെ തീരദേശത്ത് ഇല്‍മനൈറ്റ് ഖനനം നടത്താനുള്ള നീക്കം ഉപേക്ഷിക്കാന്‍ യുഡിഎഫിനോട് കെപിസിസി നിര്‍വാഹകസമിതി യോഗം ശിപാര്‍ശ ചെയ്തു. വ്യവസായമന്ത്രി കുഞ്ഞാലിക്കുട്ടിയുടെ നേതൃത്വത്തിലാണ് ധാതുമണല്‍ ഖനനത്തിനുള്ള നീക്കം നടന്നിരുന്നത്.

ഏകീകൃത സര്‍വകലാശാല നിയമത്തിലെ വിവാദവ്യവസ്ഥകള്‍ പുനപരിശോധിക്കാനും യോഗം നിര്‍ദേശിച്ചു. വി.എം. സുധീരന്‍ എംപി ഉള്‍പ്പെടെയുള്ളവര്‍ യോഗത്തില്‍ ധാതുമണല്‍ ഖനനത്തിനെതിരെ ശക്തമായ എതിര്‍പ്പ് പ്രകടിപ്പിച്ചു. സുധീരന്‍ ഒരു ഘട്ടത്തില്‍ രാജിഭീഷണിവരെ മുഴക്കി. ഇതേ തുടര്‍ന്നാണ് ഖനനം വേണ്ടെന്ന് യുഡിഎഫിനോട് ശിപാര്‍ശ ചെയ്യാന്‍ തീരുമാനിച്ചത്.

സിന്‍ഡിക്കേറ്റിനു തുല്ല്യമായ എക്സിക്യൂട്ടീവ് കൗണ്‍സിലില്‍ എംഎല്‍എ-വിദ്യാര്‍ത്ഥി പ്രാതിനിധ്യം ഒഴിവാക്കിയതാണ് ഏകീകൃതസര്‍വകലാശാല നിയമത്തിലെ ഒരു വിവാദവ്യവസ്ഥ. ജനറല്‍ കൗണ്‍സിലിന് ബജറ്റ് നിശ്ചയിക്കാന്‍ അധികാരമില്ലെന്നുള്ളതാണ് രണ്ടാമത്തെ വിവാദവിഷയം. ഈ രണ്ട് വ്യവസ്ഥകളും പുനപരിശോധിക്കാനും യോഗം നിര്‍ദേശിച്ചിട്ടുണ്ട്.

പോരായ്മകള്‍ പരിഹരിച്ച് സര്‍ക്കാര്‍ മുന്നോട്ട് പോകണമെന്ന് യോഗത്തില്‍ അഭിപ്രായമുയര്‍ന്നതായും പിന്നീട് യോഗതീരുമാനങ്ങള്‍ വിശദീകരിച്ച കെപിസിസി പ്രസിഡന്റ് കെ. മുരളീധരന്‍ പറഞ്ഞു.