കരിമണല്‍ ഖനനം: കോണ്‍ഗ്രസില്‍ തര്‍ക്കം

തിരുവനന്തപുരം: ആലപ്പുഴയിലെ കരിമണല്‍ ഖനനം സ്വകാര്യകമ്പനിയെ ഏല്പിക്കുന്നത് സംബന്ധിച്ച് കോണ്‍ഗ്രസിനുള്ളില്‍ തര്‍ക്കം രൂക്ഷമാവുന്നു. യുഡിഎഫ് കണ്‍വീനര്‍ ഉമ്മന്‍ചാണ്ടി ഖനനത്തിന് അനുകൂലമായി നില്ക്കുമ്പോള്‍ സുധീരന്‍ എംപി ഇതിനെതിരെ ശക്തമായി നിലകൊള്ളുകയാണ്. കെപിസിസി പ്രസിഡന്റ് കെ. മുരളീധരന്‍ കരിമണല്‍ ഖനനപ്രശ്നത്തില്‍ പുറമേയ്ക്ക് നിഷ്പക്ഷനിലപാടാണ് എടുക്കുന്നത്.

വിദഗ്ധസമിതിയെ നിയോഗിക്കാതെ തന്നെ ഖനനത്തിനുള്ള അനുമതി റദ്ദാക്കണമെന്ന അഭിപ്രായക്കാരനാണ് സുധീരന്‍. കേരളം കണ്ട ഏറ്റവും വലിയ അഴിമതിയാണ് കരിമണല്‍ ഖനനത്തിന് പിന്നിലെന്നും സുധീരന്‍ ആരോപിയ്ക്കുന്നു.

അതേ സമയം സുധീരന്‍ പറഞ്ഞതുകൊണ്ടാണ് വിദഗ്ധസമിതിയെ നിയോഗിച്ചതെന്ന അഭിപ്രായക്കാരനാണ് ഉമ്മന്‍ചാണ്ടി. കെപിസിസി നിര്‍വാഹകസമിതിയില്‍ സുധീരന്‍ ഈ ആവശ്യം ഉന്നയിച്ചെന്നും ഉമ്മന്‍ചാണ്ടി പറയുന്നു.

സുധീരന്‍ ആവശ്യപ്പെട്ടത് കരിമണല്‍ ഖനനത്തിന് സ്വകാര്യകമ്പനിയ്ക്ക് നല്കിയ അനുമതി റദ്ദാക്കണമെന്നാണെന്ന് കെ. മുരളീധരന്‍ വ്യക്തമാക്കി. കരിമണല്‍ ഖനനത്തിനെതിരെ സമരം ചെയ്യുന്ന സുധീരനെതിരെ പാര്‍ട്ടി നടപടിയെടുക്കില്ലെന്നും ജനപ്രതിനിധി എന്ന നിലയില്‍ പൊതുപ്രശ്നത്തില്‍ ഇടപെടുന്നതില്‍ തെറ്റില്ലെന്നും മുരളീധരന്‍ വ്യക്തമാക്കി. വിദഗ്ധസമിതി ഖനനം വേണ്ടെന്ന് അഭിപ്രായപ്പെട്ടാല്‍ ആ നിമിഷം ഖനനം റദ്ദാക്കാമെന്നും മുരളീധരന്‍ അറിയിച്ചു.