മാറാട് കലാപമുണ്ടാകുമെന്ന് ഇന്റലിജന്‍സ്

തിരുവനന്തപുരം: മാറാട് വീണ്ടും കലാപമുണ്ടാകാന്‍ സാധ്യതയുണ്ടെന്ന് ഇന്റലിജന്‍സ് റിപ്പോര്‍ട്ട്. ജൂണ്‍ 16 തിങ്കളാഴ്ച മുഖ്യമന്ത്രി എ.കെ. ആന്റണിയാണ് ഇക്കാര്യം നിയമസഭയില്‍ അറിയിച്ചത്.

സംസ്ഥാന പൊലീസിലെ ഇന്റലിജന്‍സ് വകുപ്പ് ഇക്കാര്യം കോഴിക്കോട് സിറ്റി പൊലീസിനെ അറിയിച്ചിട്ടുണ്ട്. മാറാട് കലാപത്തിന്റെ ഒന്നാം വാര്‍ഷികത്തോടനുബന്ധിച്ചാണ് കലാപം നടത്താന്‍ ചിലര്‍ പദ്ധതി തയ്യാറാക്കുന്നതെന്നാണ് ഇന്റലിജന്‍സ് റിപ്പോര്‍ട്ട്. - ആന്റണി വ്യക്തമാക്കി.

ഇതിനെ തുടര്‍ന്ന് മാറാടും പരിസരപ്രദേശത്തും പൊലീസ് പട്രോളിംഗും പിക്കറ്റും കാര്യക്ഷമമാക്കിയിട്ടുണ്ട്. അതേ സമയം മാറാട് വീണ്ടും കലാപമുണ്ടായേക്കുമെന്ന് തമിഴ്നാട് പൊലീസാണ് കേരളത്തെ അറിയിച്ചതെന്ന കാര്യം അദ്ദേഹം നിഷേധിച്ചു. മാറാട് കലാപവുമായി ബന്ധപ്പെട്ടുള്ള 41 കേസുകളില്‍ രണ്ട് കേസുകള്‍ മാത്രമാണ് ക്രൈംബ്രാഞ്ച് അന്വേഷിക്കുന്നത്. ബാക്കി കേസുകളെല്ലാം സംസ്ഥാന പൊലീസാണ് അന്വേഷിക്കുന്നത്. - ആന്റണി പറഞ്ഞു.