കോമ്രേഡിന് നിരോധനം തുടരുന്നു

തിരുവനന്തപുരം: സി പി ഐ (എം എല്‍) റെഡ്ഫ്ലാഗിന്റെ വാരികയായ കോമ്രേഡിന്റെ പ്രസിദ്ധീകരണം അപ്രഖ്യാപിത നിരോധനം മൂലം മുടങ്ങിക്കിടക്കുന്നു.

സംസ്ഥാനത്ത് പ്രവര്‍ത്തിക്കുന്ന തീവ്രവാദി സംഘടനകളുടെ അനൗദ്യോഗിക ലിസ്റില്‍ സി പി ഐ (എം എല്‍) റെഡ് ഫ്ലാഗ് ഉള്‍പ്പെട്ടതിനെ തുടര്‍ന്നാണ് 2002 മെയ് മുതല്‍ കോമ്രേഡിന്റെ പ്രസിദ്ധീകരണം സര്‍ക്കാര്‍ തടഞ്ഞുവെച്ചത്.

കോമ്രേഡിന്റെ ഓഫീസ് തൃശൂരില്‍ നിന്ന് തിരുവനന്തപുരത്തേക്ക് മാറ്റി പ്രസിദ്ധീകരണം പുനരാരംഭിക്കാനുള്ള നീക്കങ്ങള്‍ നടക്കുന്നുണ്ടെങ്കിലും സര്‍ക്കാരിന്റെ ഭാഗത്തു നിന്ന് അനുകൂല നടപടിക്ക് സാധ്യതയില്ല.

ഒരു പ്രസിദ്ധീകരണത്തിന്റെ ഓഫീസ് മറ്റൊരു ജില്ലയിലേക്ക് മാറ്റുന്നതിന്റെ ഭാഗമായി റെഡ് ഫ്ലാഗ് സംസ്ഥാന സെക്രട്ടറി പി. സി. ഉണ്ണിച്ചെക്കന്‍ തൃശൂര്‍ അഡീഷണല്‍ മജിസ്ട്രേറ്റിന് നല്‍കിയ ഡിക്ലറേഷന്‍ തടഞ്ഞുവെച്ചിരിക്കുകയാണ്.

നിസ്സാരമായ കാരണങ്ങള്‍ പറഞ്ഞാണ് പ്രസിദ്ധീകരണാനുമതി നല്‍കാത്തതെന്ന് ഉണ്ണിച്ചെക്കന്‍ ആരോപിച്ചു. നേരത്തെ കോട്ടയത്തു നിന്ന് തൃശൂരേക്ക് ഓഫീസ് മാറ്റുമ്പോള്‍ ഇത്തരം തടസങ്ങളൊന്നുമുണ്ടായിരുന്നില്ല. ഇത്തവണ സര്‍ക്കാര്‍ ബോധപൂര്‍വമാണ് തടസമുന്നയിക്കുന്നത്- ഉണ്ണിച്ചെക്കന്‍ പറഞ്ഞു.

അതേ സമയം കോമ്രേഡിന്റെ പ്രിന്ററും പബ്ലിഷറുമായ ഉണ്ണിച്ചെക്കന്റെ പശ്ചാത്തലത്തെ കുറിച്ചുള്ള പൊലീസ് അന്വേഷണം പൂര്‍ത്തിയായ ശേഷമേ പ്രസിദ്ധീകരണാനുമതി നല്‍കുകയുള്ളൂവെന്ന് തിരുവനന്തപുരം എ ഡി എം പുരുഷോത്തമന്‍ പോറ്റി പറഞ്ഞു.

മലപ്പുറം എസ് പിയില്‍ നിന്ന് ഇതുവരെ റിപ്പോര്‍ട്ട് ലഭിച്ചിട്ടില്ല. സി പി ഐ (എം എല്‍) തീവ്രവാദ സംഘടനയായി കണക്കാക്കപ്പെടുന്നതു കൊണ്ടാണ് ഇത്തരമൊരു അന്വേഷണം നടത്തേണ്ടിവന്നത്- പുരുഷോത്തമന്‍ പോറ്റി പറഞ്ഞു.