ഐ ഗ്രൂപ്പിന്റെ ബഹിഷ്കരണം തലവേദന
തിരുവനന്തപുരം: നിയമസഭയിലെ ധനാഭ്യര്ഥന ചര്ച്ച ബഹിഷ്കരിക്കുന്നതിനുള്ള ഐ ഗ്രൂപ്പിന്റെ തീരുമാനം സര്ക്കാരിന് തലവേദനയാവുന്നു.
ഐ ഗ്രൂപ്പിന്റെ ചര്ച്ചയിലെ അഭാവം മുതലെടുത്ത് സര്ക്കാരിനെ ആക്രമിക്കാനുള്ള അവസരമായി ഉപയോഗിക്കുകയാണ് പ്രതിപക്ഷം. ധനാഭ്യര്ഥന ചര്ച്ചയുടെ ആദ്യദിവസമായ ജൂണ് 24 ചൊവാഴ്ച പ്രതിപക്ഷ നേതാവ് വി. എസ്. അച്യുതാനന്ദനും സി പി ഐ നിയമസഭാകക്ഷി നേതാവ് കെ. പി. രാജേന്ദ്രനും ഐ ഗ്രൂപ്പ് ചര്ച്ചയില് നിന്ന് മാറിനില്ക്കുന്നത് ചൂണ്ടിക്കാട്ടി സര്ക്കാരിനെ ആക്രമിച്ചു.
സര്ക്കാര് അവകാശപ്പെടുന്നതു പോലെ രണ്ടു വര്ഷത്തെ ഭരണം വിജയമാണെങ്കില് എന്തുകൊണ്ടാണ് ഒരു വിഭാഗം ഭരണകക്ഷി എം എല് എമാര് ചര്ച്ചകള് ബഹിഷ്കരിക്കുന്നതെന്ന് അച്യുതാനന്ദന് ചോദിച്ചു.
അതേ സമയം ഐ ഗ്രൂപ്പിന്റെ ചര്ച്ചാ ബഹിഷ്കരണത്തിന്റെ പശ്ചാത്തലത്തില് ഒത്തുതീര്പ്പിനായി കെ പി സി സി പ്രസിഡന്റ് കെ. മുരളീധരന് ശ്രമം തുടങ്ങി. കെ. കരുണാകരനുമായി ചര്ച്ച നടത്തിയ ശേഷം അദ്ദേഹം ഉമ്മന്ചാണ്ടിയെ കണ്ട് കരുണാകരന് മുന്നോട്ടുവെച്ച നിര്ദേശങ്ങള് അറിയിച്ചു. ഉമ്മന്ചാണ്ടി നിര്ദേശങ്ങള് ആന്റണിയെ അറിയിക്കുമെന്ന് മുരളി പറഞ്ഞു.