ആശുപത്രി വികസനത്തിന് സ്വകാര്യ പങ്കാളിത്തം
തിരുവനന്തപുരം: സര്ക്കാര് ആശുപത്രികളിലെ അടിസ്ഥാന സൗകര്യങ്ങള് വികസിപ്പിക്കാന് സ്വകാര്യ പങ്കാളിത്തം ഉള്പ്പെടുത്തുന്നതിന് സര്ക്കാര് തത്വത്തില് അംഗീകരിച്ചിട്ടുണ്ടെന്ന് ആരോഗ്യമന്ത്രി പി. ശങ്കരന് നിയമസഭയില് പറഞ്ഞു.
മത്തായി ചാക്കോ (സി പി എം) യുടെ ശ്രദ്ധ ക്ഷണിക്കല് പ്രമേയത്തിന് മറുപടി പറയുകയായിരുന്നു മന്ത്രി. സര്ക്കാരിന്റെ കൈയില് മതിയായ ഫണ്ടില്ലാത്തതിനാല് സര്ക്കാര് ആശുപത്രികള് സ്വകാര്യ പങ്കാളിത്തമില്ലാതെ മെച്ചപ്പെടുത്താനാവില്ല.
അടിസ്ഥാന സൗകര്യങ്ങള് വികസിപ്പിക്കുന്നതിനും പാവപ്പെട്ട രോഗികള്ക്ക് സൂപ്പര് സ്പെഷ്യാലിറ്റി ചികിത്സ നല്കുന്നതിനും വിവിധ പദ്ധതി നിര്ദേശങ്ങള് സ്വകാര്യ നിക്ഷേപകരില് നിന്നും സര്ക്കാരിന് ലഭിച്ചിട്ടുണ്ട്. ഇവയില് മിക്കവയും ബി ഒ ടി (നിര്മിച്ച്, പ്രവര്ത്തിപ്പിച്ച് കൈമാറല്) അടിസ്ഥാനത്തിലുള്ളതാണ്.
കോഴിക്കോട് മെഡിക്കല് കോളജ് ആശുപത്രിയില് വരാന്പോവുന്ന സൂപ്പര് സ്പെഷ്യാലിറ്റി വിഭാഗം ഒരു സ്വകാര്യ സ്ഥാപനത്തിന് വായ്പയ്ക്ക് കൊടുക്കാന് തീരുമാനിച്ചിട്ടില്ല. 20 കോടി ചെലവില് സൂപ്പര് സ്പെഷ്യാലിറ്റി വിംഗ് സ്ഥാപിക്കുന്നതിന് ഷാര്ജ ആസ്ഥാനമായുള്ള ഒരു കമ്പനിയുമായി ധാരണാപത്രത്തില് ഒപ്പുവെച്ചിട്ടുണ്ട്.പകര്ച്ചപ്പനി തടയുന്നതിന് ആവശ്യമായ മരുന്നുകള് ആശുപത്രികളിലുണ്ടെന്ന് മന്ത്രി പറഞ്ഞു.