സ്വാശ്രയ മെഡി. സീറ്റിന് 1.76 ലക്ഷം

തിരുവനന്തപുരം: സംസ്ഥാനത്തെ സ്വാശ്രയ മെഡിക്കല്‍ കോളെജുകളിലെ മെറിറ്റ് സീറ്റുകളിലേക്കുള്ള വാര്‍ഷിക ഫീസ് 1.76 ലക്ഷം രൂപയായി നിശ്ചയിക്കാന്‍ മന്ത്രിസഭായോഗം തീരുമാനിച്ചു.

ഗവണ്‍മെന്റ് സെക്രട്ടറിമാരുടെ സമിതിയുടെ ശുപാര്‍ശയുടെ അടിസ്ഥാനത്തിലാണ് ഫീസ് സംബന്ധിച്ച് തീരുമാനമെടുത്തതെന്ന് മുഖ്യമന്ത്രി എ. കെ. ആന്റണി പറഞ്ഞു. സ്വാശ്രയ മെഡിക്കല്‍ കോളെജ് മാനേജ്മെന്റുകളുമായി നടത്തിയ ചര്‍ച്ചയുടെ അടിസ്ഥാനത്തിലാണ് സമിതി ഈ ശുപാര്‍ശ മുന്നോട്ടുവെച്ചത്. ഫീസ് നിശ്ചയിക്കുന്നതു സംബന്ധിച്ച് ഹൈക്കോടതി നിര്‍ദേശവുമുണ്ടായിരുന്നു.

സ്വാശ്രയ കോളെജുകളിലേതുള്‍പ്പെടെ എല്ലാ വിദ്യാഭ്യാസ സ്ഥാപനങ്ങളിലെയും ഫീസ് നിശ്ചയിക്കാനുള്ള അധികാരം സര്‍ക്കാരിനായിരിക്കുമെന്ന വ്യവസ്ഥ ഏകീകൃത സര്‍വകലാശാലാ ബില്ലില്‍ ഉള്‍പ്പെടുത്തിയിട്ടുണ്ട്.

സ്വാശ്രയ കോളെജുകളില്‍ അമ്പത് ശതമാനം മെറിറ്റ് സീറ്റും അമ്പത് ശതമാനം മാനേജ്മെന്റ് സീറ്റുമായിരിക്കുമെന്ന നയത്തില്‍ മാറ്റമില്ല. സ്വാശ്രയ മെഡിക്കല്‍ കോളെജുകളിലെ സീറ്റ് നിശ്ചയിക്കുന്നതിനുള്ള അധികാരം സര്‍ക്കാരിനായിരിക്കുമെന്ന് അഖിലേന്ത്യാ സാങ്കേതിക വിദ്യാഭ്യാസ കൗണ്‍സിലിന്റെ മാര്‍ഗനിര്‍ദേശത്തില്‍ പറയുന്നുമുണ്ട്- മുഖ്യമന്ത്രി പറഞ്ഞു.