ഫീസ് ഏകീകരിക്കാന്‍ നിയമം പരിഗണനയില്‍

തിരുവനന്തപുരം: സ്വാശ്രയ മെഡിക്കല്‍ കോളെജുകളിലെയും സര്‍ക്കാര്‍, എയ്ഡഡ് മെഡിക്കല്‍ കോളെജുകളിലെയും മെറ്റിറ്റ് സീറ്റുകളിലെ ഫീസ് ഏകീകരിക്കുന്നതിന് നിയമം കൊണ്ടുവരുന്നത് സര്‍ക്കാരിന്റെ പരിഗണനയിലുണ്ടെന്ന് ആരോഗ്യമന്ത്രി പി. ശങ്കരന്‍ നിയമസഭയില്‍ അറിയിച്ചു.

പ്രതിപക്ഷ നേതാവ് വി. എസ്. അച്യുതാനന്ദന്റെ സബ്മിഷന് മറുപടി പറയുകയായിരുന്നു അദ്ദേഹം.

സര്‍ക്കാര്‍, എയ്ഡഡ് മെഡിക്കല്‍ കോളജുകളിലെ ഫീസ് തന്നെയായിരിക്കണം സ്വാശ്രയ മെഡിക്കല്‍ കോളജുകളിലെ മെറിറ്റ് സീറ്റുകളിലും ഏര്‍പ്പെടുത്തേണ്ടതെന്നാണ് സര്‍ക്കാര്‍ താത്പര്യപ്പെടുന്നത്. എന്നാല്‍ ഇതുസംബന്ധിച്ച സുപ്രിം കോടതി വിധി ഫീസ് ഏകീകകരിക്കുന്നതിന് അനുവദിക്കുന്നില്ല- മന്ത്രി പറഞ്ഞു.

സ്വാശ്രയ മെഡിക്കല്‍ കോളജുകളിലെ മെറിറ്റ് സീറ്റുകളില്‍ കുറഞ്ഞ വരുമാനക്കാരുടെ വിഭാഗത്തില്‍ പെടുന്ന വിദ്യാര്‍ഥികള്‍ക്ക് ഫീസ് കുറയ്ക്കുമെന്ന് വിദ്യാഭ്യാസമന്ത്രി നാലകത്ത് സൂപ്പി അറിയിച്ചു.

നേരത്തെ സ്വാശ്രയ മെഡിക്കല്‍ കോളജുകളിലെ മെറിറ്റ് സീറ്റുകളിലെ ഫീസ് 1.76 ലക്ഷമാക്കിയത് സര്‍ക്കാരും വിദ്യാഭ്യാസ കച്ചവടക്കാരും തമ്മിലുള്ള ബന്ധമാണ് വെളിപ്പെടുത്തുന്നതെന്ന് അച്യുതാനന്ദന്‍ ആരോപിച്ചു.

സാധാരണക്കാരായ കുട്ടികള്‍ക്ക് സ്വാശ്രയ മെഡിക്കല്‍ കോളജുകളിലെ മെറിറ്റ് സീറ്റില്‍ പ്രവേശനം ലഭിച്ചാലും പഠിക്കാനാവില്ല എന്നതാണ് സ്ഥിതി. ബാക്കിയുള്ള അമ്പത് ശതമാനം സീറ്റില്‍ മാനേജ്മെന്റുകള്‍ക്ക് തോന്നിയതു പോലെ ഫീസ് നിശ്ചയിക്കാം.

ഫീസ് നിശ്ചയിക്കുന്നതില്‍ സംസ്ഥാന സര്‍ക്കാരുകള്‍ക്ക് സ്വാതന്ത്യ്രം അനുവദിക്കുന്ന വ്യവസ്ഥ സുപ്രിം കോടതി വിധിയിലുണ്ടെന്ന് അച്യുതാനന്ദന്‍ പറഞ്ഞു.