തോമസ് രാജിവയ്ക്കണമെന്ന് കരുണാകരന്‍

കൊച്ചി: കണക്കിലധികം സ്വത്ത് സമ്പാദിച്ച കേസില്‍ വിജിലന്‍സ് അന്വേഷണം നേരിടുന്ന വ്യക്തിക്ക് മന്ത്രിസ്ഥാനത്ത് തുടരാന്‍ അര്‍ഹതയില്ലെന്ന് കെ. കരുണാകരന്‍.

മന്ത്രി കെ.വി. തോമസിന്റെ പേരെടുത്ത് പറയാതെയാണ് തോമസിന്റെ രാജിയ്ക്ക് വേണ്ടി കെ. കരുണാകരന്‍ പരോക്ഷമായി ആവശ്യമുയര്‍ത്തിയത്. വിജിലന്‍സ് കമ്മീഷനും പ്രത്യേക ജഡ്ജും അന്വേഷണഉത്തരവിട്ട സ്ഥിതിയ്ക്ക് മന്ത്രിസ്ഥാനം ഒഴിയാന്‍ ഇദ്ദേഹത്തിന് ബാധ്യതയുണ്ട്. - കരുണാകരന്‍ പറഞ്ഞു.

എന്നാല്‍ തോമസ് രാജിവയ്ക്കേണ്ടതില്ലെന്ന കെപിസിസി പ്രസിഡന്റ് കെ. മുരളീധരന്റെ പ്രസ്താവന ശ്രദ്ധയില്‍ പ്പെടുത്തിയപ്പോള്‍ വിജിലന്‍സ് ഉത്തരവ് വിശദമായി വായിക്കുന്ന ആരും മന്ത്രിയുടെ രാജി ആവശ്യമാണെന്ന് സമ്മതിയ്ക്കുമെന്നും കരുണാകരന്‍ പറഞ്ഞു. പണ്ട് തനിയ്ക്കെതിരെ കോടതി വിധി വന്ന പശ്ചാത്തലത്തില്‍ ഒരു മണിക്കൂറിനുള്ളില്‍ മന്ത്രിസ്ഥാനം രാജിവച്ച കാര്യവും കരുണാകരന്‍ ഓര്‍മ്മിപ്പിച്ചു.

മാറാട് പുനരധിവാസം നിര്‍ത്തിവച്ചത് സര്‍ക്കാരിന്റെ കഴിവുകേടാണ്. സ്വന്തം വീട്ടില്‍ താമസിക്കാന്‍ ആഗ്രഹിക്കുന്നവരുടെ ജീവിതം സംരക്ഷിയ്ക്കാന്‍ കഴിവില്ലെങ്കില്‍ ആ സര്‍ക്കാരിനെക്കുറിച്ച് കൂടുതലൊന്നും പറയാനില്ലെന്നും കരുണാകരന്‍ പറഞ്ഞു.