മാറാട്: ബലപ്രയോഗത്തിന് ശുപാര്‍ശ ചെയ്യും

കോഴിക്കോട്: മാറാട്ടെ പുനരധിവാസ നടപടി തടയുന്നവരെ പൊലീസിനെ ഉപയോഗിച്ച് പിരിച്ചയക്കാന്‍ മന്ത്രിസഭാ ഉപസമിതിയോട് ശുപാര്‍ശ ചെയ്യുമെന്ന് ജില്ലാ കളക്ടര്‍ ടി. ഒ. സൂരജ് പറഞ്ഞു.

മാറാട്ട് പുനരധിവസിപ്പിക്കപ്പെട്ട കുടുംബങ്ങള്‍ക്ക് അവിടെ താമസിക്കേണ്ടതില്ലെന്ന് തോന്നുകയാണെങ്കില്‍ തിരിച്ചുപോവാം. തിരിച്ചുപോവണമെന്ന് നേരത്തെ താത്പര്യം പ്രകടിപ്പിച്ച കുടുംബം വീണ്ടും ഈ ആവശ്യം ഉന്നയിക്കുകയാണെങ്കില്‍ അവരെ തിരിച്ചുപോവാന്‍ അനുവദിക്കും.

പുനരധിവാസ പ്രവര്‍ത്തനവുമായി സഹകരിക്കാന്‍ അരയസമാജവുമായി ചര്‍ച്ചകള്‍ നടത്തിവരികയാണെന്ന് കളക്ടര്‍ പറഞ്ഞു.

അതിനിടെ മാറാട്ട് പുനരധിവസിപ്പിക്കപ്പെട്ട കുടുംബം തിരിച്ചുപോവണമെന്ന ആവശ്യവുമായി പ്രക്ഷോഭം തുടരുന്നതിന് അരയസമാജം തീരുമാനിച്ചു. മാറാട് കേസിലെ ചില പ്രതികളുടെ ബന്ധുക്കളാണ് ഈ കുടുംബത്തിലെ അംഗങ്ങളെന്ന് അരയസമാജം ആരോപിച്ചു. ഈ കുടുംബം മാറാട് തുടരുന്നത് മാറാട്ടെ അന്തരീക്ഷം വഷളാക്കുമെന്നും അവര്‍ ചൂണ്ടിക്കാട്ടി.