കേരളകോണ്‍(എം) ജില്ലാ സെക്രട്ടറി രാജിവച്ചു

കൊച്ചി: കേരള കോണ്‍ഗ്രസ് -മാണിഗ്രൂപ്പിലെ എറണാകുളം ജില്ലാ ജനറല്‍ സെക്രട്ടറി രാജിവച്ച് കേന്ദ്രസഹമന്ത്രി പി.സി. തോമസിന്റെ പാര്‍ട്ടിയില്‍ ചേര്‍ന്നു.

മാണിഗ്രൂപ്പ് ജില്ലാ ജനറല്‍ സെക്രട്ടറിയും പിറവം നിയമസഭാ നിയോജകമണ്ഡലം പ്രസിഡന്റുമായ എം. ബോബിയോടൊപ്പം ആയിരക്കണക്കിന് പാര്‍ട്ടിപ്രവര്‍ത്തകരും രാജിവച്ചിട്ടുണ്ട്. ഇവരെല്ലാവരും ബോബിയോടൊപ്പം പി.സി. തോമസിന്റെ ഐഎഫ്ഡിപിയില്‍ ചേര്‍ന്നു.

ഐഎഫ്ഡിപി സംസ്ഥാന പ്രസിഡന്റ് സ്കറിയ തോമസ് ജൂലായ് ഒന്ന് ചൊവാഴ്ച വാര്‍ത്താസമ്മേളനത്തിലാണ് ബോബിയുടെ രാജിക്കാര്യം ഔദ്യോഗികമായി പ്രഖ്യാപിച്ചത്. ഏകദേശം 4000 പ്രവര്‍ത്തര്‍ കേരളാ കോണ്‍ഗ്രസ്(മാണി) ഗ്രൂപ്പില്‍ നിന്നും രാജിവച്ച് ഐഎഫ്ഡിപിയില്‍ ചേര്‍ന്നിട്ടുണ്ട്. ഇതില്‍ 10 പേര്‍ പിറവം നിയോജകമണ്ഡലത്തിലെ വിവിധ പഞ്ചായത്തുകളിലെ നേതാക്കളാണ്. - സ്കറിയ തോമസ് പറഞ്ഞു.

കേരള കോണ്‍ഗ്രസ്(മാണി) ഗ്രൂപ്പിന്റെ പ്രവര്‍ത്തനത്തില്‍ അതൃപ്തരായ പ്രവര്‍ത്തകരാണ് രാജിവച്ചിരിക്കുന്നതെന്നും സ്കറിയ തോമസ് പറഞ്ഞു. കേരള കോണ്‍ഗ്രസ്(മാണി) ഗ്രൂപ്പിനൊപ്പം തുടര്‍ന്നാല്‍ ജനങ്ങളെ സേവിക്കാന്‍ കഴിയില്ലെന്ന് മനസ്സിലായെന്ന് വാര്‍ത്താസമ്മേളനത്തില്‍ പങ്കെടുത്ത ബോബി പറഞ്ഞു.