മാറാട്: കുഞ്ഞാലിക്കുട്ടിയ്ക്ക് അതൃപ്തി

തിരുവനന്തപുരം: മാറാട് പുനരധിവാസം സര്‍ക്കാര്‍ കൈകാര്യം ചെയ്ത രീതിയില്‍ മുസ്ലീംലീഗിന് അതൃപ്തിയുണ്ടെന്ന് മന്ത്രി കുഞ്ഞാലിക്കുട്ടി. വാര്‍ത്താസമ്മേളനത്തിലാണ് അദ്ദേഹം ഇക്കാര്യം അറിയിച്ചത്.

മാറാട് വിട്ടോടിപ്പോയവരെ പുനരധിവസിപ്പിക്കുന്ന കാര്യത്തില്‍ ഒരിഞ്ചുപോലും മുന്നേറാന്‍ സര്‍ക്കാരിന് കഴിഞ്ഞില്ല. പിന്നെ എങ്ങിനെയാണ് മുസ്ലിം ലീഗിന് സംതൃപ്തിയുണ്ടാകുക-കുഞ്ഞാലിക്കുട്ടി ചോദിച്ചു.

മാറാട്ട് അരുതാത്തത് ഒരു പാട് സംഭവിച്ചു. ഇപ്പോള്‍ ഒരുപാട് അരുതായ്മകള്‍ സംഭവിച്ചുകൊണ്ടിരിക്കുന്നു. ഒരു ഭാഗത്ത് മുസ്ലിം തീവ്രവാദം മുതലെടുത്ത് വളരാന്‍ ശ്രമിക്കുന്ന ഒരു ഗ്രൂപ്പ്. മറ്റൊരു ഭാഗത്ത് വര്‍ഗ്ഗീയ നിറം നല്കി കേരളത്തിന്റെ ചിത്രം മാറ്റിമറിയ്ക്കാന്‍ ശ്രമിയ്ക്കുന്ന മറ്റൊരു ഗ്രൂപ്പ്. - കുഞ്ഞാലിക്കുട്ടി പറഞ്ഞു.

പ്രവീണ്‍ തൊഗാഡിയ, അശോക് സിംഗാള്‍ എന്നിവര്‍ മാറാട് സന്ദര്‍ശിക്കുന്നതിനെ തടയാന്‍ സര്‍ക്കാരിനോട് ആവശ്യപ്പെടുമോ എന്ന ചോദ്യത്തിന് അതിനെക്കുറിച്ച് ആലോചിച്ചിട്ടില്ല എന്നായിരുന്നു മറുപടി.