എല്ലാ ജില്ലകളിലും കുടുംബ കോടതി

തൃശൂര്‍: പാര്‍ലമെന്റിന്റെ സ്ത്രീ ശാക്തീകരണ സമിതിയുടെ ശുപാര്‍ശ പ്രകാരം എല്ലാ ജില്ലകളിലും കുടുംബ കോടതികള്‍ സ്ഥാപിക്കാന്‍ തീരുമാനിച്ചിട്ടുണ്ടെന്ന് കേന്ദ്ര നിയമസഹമന്ത്രി പി. സി. തോമസ് അറിയിച്ചു.

രാജ്യത്തെ എല്ലാ ജില്ലാകോടികളും കമ്പ്യൂട്ടര്‍വത്കരിക്കുന്നതിനുള്ള പദ്ധതി ധനകാര്യകമ്മിഷന്റെ അനുമതി ലഭിച്ച ശേഷം നടപ്പിലാക്കും. ഓരോ ജില്ലാ കോടതിയും കമ്പ്യൂട്ടര്‍വത്കരിക്കുന്നതിന് രണ്ട് കോടി രൂപയാണ് ചെലവ്. മൊത്തം 1200 കോടിയാണ് ചെലവ് കണക്കാക്കുന്നത്. എല്ലാ ജില്ലാ കോടതികളും നെറ്റ്വര്‍ക്ക് വഴി ബന്ധിപ്പിച്ചിരിക്കും. രാജ്യത്തെ നാല് വന്‍നഗരങ്ങളിലായിരിക്കും പദ്ധതി ആദ്യം നടപ്പിലാക്കുന്നത്.

രാജ്യത്തെ ജില്ലാ കോടതികളുള്‍പ്പെടെ കീഴ്കോടതികളില്‍ ജഡ്ജിമാരുടെ രണ്ടായിരത്തോളം തസ്തികകള്‍ ഒഴിഞ്ഞുകിടപ്പുണ്ട്. ഉന്നതതല കോടതികളിലും ജഡ്ജിമാരുടെ ഒഴിവുണ്ട്. ജില്ലാ കോടതികളിലെ ഒഴിവുകള്‍ നികത്താന്‍ കേന്ദ്ര നിയമമന്ത്രി അരുണ്‍ ജെറ്റ്ലി എല്ലാ ഹൈക്കോടതികള്‍ക്കും കത്തയച്ചിട്ടുണ്ട്.

അതിവേഗ കോടതികള്‍ സ്ഥാപിച്ചിട്ടും കേസുകളുടെ വിചാരണയിലുണ്ടാവുന്ന കാലതാമസം ഒഴിവാക്കുക എന്ന ലക്ഷ്യം പൂര്‍ത്തീകരിക്കാന്‍ കഴിഞ്ഞിട്ടില്ല. രാജ്യത്ത് 1773 അതിവേഗ കോടതികള്‍ സ്ഥാപിക്കണമെന്നായിരുന്നു നിര്‍ദേശമെങ്കിലും 1300 കോടതികള്‍ മാത്രമേ സ്ഥാപിച്ചിട്ടുള്ളൂ.

കേരളത്തില്‍ 38 കോടതികളാണ് സ്ഥാപിക്കേണ്ടത്. എന്നാല്‍ 27 അതിവേഗ കോടതികള്‍ മാത്രമേ ഇതുവരെയായി നിലവില്‍വന്നിട്ടുള്ളൂ. ഒരു അതിവേഗകോടതിയില്‍ മാസത്തില്‍ 14 കേസുകള്‍ പൂര്‍ത്തിയാക്കേണ്ടേതാണ്. എന്നാല്‍ പല കാരണങ്ങളാല്‍ ഇത് സാധിക്കുന്നില്ല- പി. സി. തോമസ് പറഞ്ഞു.