ജൈവ കോഴി വളര്ത്തലിന് പ്രചാരമേറുന്നു
കൊച്ചി: വേഗം വളരാനായി ഹോര്മോണ് കുത്തിവയ്ക്കാത്ത, ജൈവഫാമുകളില് വളര്ത്തുന്ന നാടന് കോഴികള്ക്ക് പ്രിയമേറുന്നു.
ഇന്ഫാമാണ് നാടന്കോഴി വളര്ത്തലിന് പ്രചാരം നല്കുന്നത്. കൊച്ചി കേന്ദ്രമായി പ്രവര്ത്തിക്കുന്ന മീറ്റ് മാര്ട്ടില് ജൈവഫാമിലുണ്ടാക്കുന്ന നാടന് കോഴിയ്ക്ക് നല്ല വില്പനയാണ്. ജൈവ കോഴി വില്ക്കുന്ന സംസ്ഥാനത്തെ ഒരേയൊരു സ്ഥാപനമാണ് മീറ്റ് മാര്ട്ട്.
ഒരു കിലോ ജൈവ കോഴിക്ക് 95 കിലോയാണ് വില. ബ്രോയിലര് കോഴിക്കാകട്ടെ കിലോക്ക് വില 45 രൂപയാണ്. എന്നാല് വില കൂടുതലാണെങ്കിലും ഹോര്മോണില്ലാത്ത സ്വാദിഷ്ടമായ നാടന് കോഴി വാങ്ങുന്നതിന് നല്ല തിരക്കാണ്.
കോട്ടയം, പാല പ്രദേശങ്ങളിലെ മുപ്പതോളം കര്ഷകരാണ് ജൈവ കോഴി വളര്ത്തല് നടത്തുന്നത്. മീന് പൊടിയും പിണ്ണാക്കും കാല്സ്യവും ചേര്ന്ന ജൈവ തീറ്റയാണ് കോഴികള്ക്ക് ഈ ഫാമുകളില് നല്കുന്നത്.
ജൈവ ഫാമുകളിലെ കോഴികള്ക്ക് 45 ദിവസത്തിനുള്ളില് ഒരു കിലോ ഭാരം മാത്രമേയുണ്ടാവുകയുള്ളൂ. അതേ സമയം ബ്രോയിലര് കോഴിക്ക് ഇത്രയും ദിവസത്തിനുള്ളില് രണ്ടര കിലോ ഭാരമുണ്ടാവും. ഒരു കിലോഗ്രാം തൂക്കമുണ്ടാവാന് ബ്രോയിലര് ചിക്കന് രണ്ട് കിലോ തീറ്റ നല്കിയാല് മതിയാവും. ജൈവകോഴിക്ക് നാല് കിലോ തീറ്റ നല്കിയാലേ ഒരു കിലോ തൂക്കമുണ്ടാവൂ. എന്നാല് ബ്രോയിലര് ചിക്കനേക്കാള് ഇരട്ടിയിലധികം വില നല്കി ജൈവ കോഴി വാങ്ങാനാളുണ്ടെന്നതിനാല് ജൈവ കോഴി കര്ഷകര്ക്ക് നല്ല ലാഭമുണ്ടാക്കാനാവുന്നു.
ജൈവ കോഴിയെയും ബ്രോയിലര് കോഴിയെയും വേര്തിരിച്ചറിയാന് ഉപഭോക്താക്കള്ക്ക് കഴിയില്ലെന്നതിനാല് ജൈവ കോഴിക്ക് സര്ട്ടിഫിക്കറ്റ് നല്കണമെന്ന് കര്ഷകര് ആലുവയിലെ ഇന്ത്യന് ഓര്ഗാനിക് സര്ട്ടിഫിക്കേഷന് ഏജന്സിയോട് ആവശ്യപ്പെട്ടിട്ടുണ്ട്. ഇത് ചെയ്യാനായി ഓരോ ഫാമും 4000 രൂപ കൂടി ചെലവാക്കേണ്ടി വരും.