ശങ്കരാചാര്യര്‍ നടത്തുന്ന ചര്‍ച്ച വിഫലമാവും

കോഴിക്കോട്: കാഞ്ചി ശങ്കരാചാര്യര്‍ അഖിലേന്ത്യാ മുസ്ലിം വ്യക്തിനിയമ ബോര്‍ഡുമായി നടത്തുന്ന ചര്‍ച്ചയിലൂടെ അയോധ്യാ പ്രശ്നത്തിന് പരിഹാരമുണ്ടാക്കാനാവുമെന്ന് കരുതുന്നില്ലെന്ന് വി എച്ച് പി അന്തര്‍ദേശീയ സെക്രട്ടറി പ്രവിണ്‍ തൊഗാഡിയ പറഞ്ഞു.

വി എച്ച് പി മതനേതാവെന്ന നിലയില്‍ കാഞ്ചി ശങ്കരാചാര്യരെ ബഹുമാനിക്കുന്നുണ്ട്. മുസ്ലിം വ്യക്തിനിയമ ബോര്‍ഡുമായി അദ്ദേഹം നടത്തുന്ന ചര്‍ച്ചയെ വി എച്ച് പി സ്വാഗതം ചെയ്യുന്നു. എന്നാല്‍ ചര്‍ച്ചകളിലൂടെ അയോധ്യാപ്രശ്നം പരിഹരിക്കാനാവുമെന്ന് വി എച്ച് പിക്ക് വിശ്വാസമില്ല.

അയോധ്യാ പ്രശ്നപരിഹാരത്തിന് കാഞ്ചി ശങ്കരാചാര്യര്‍ ഒരു ഫോര്‍മുലയുമായി മുന്നോട്ടുവന്നാല്‍ അതിലെ സമീപനത്തെ ആശ്രയിച്ചായിരിക്കും വി എച്ച് പിയുടെ നിലപാട്. മതനേതാവെന്നമ നിലയില്‍ കാഞ്ചി ശങ്കരാചാര്യരെ വി എച്ച് പി ബഹുമാനിക്കുന്നുണ്ടെങ്കിലും അദ്ദേഹത്തിന്റെ തീരുമാനങ്ങളെ ചില കേന്ദ്രങ്ങള്‍ സ്വാധീനിക്കുന്നുണ്ട്.

അടുത്ത പാര്‍ലമെന്റ് തിരഞ്ഞെടുപ്പില്‍ വി എച്ച് പി എന്‍ ഡി എയെ പിന്തുണയ്ക്കുമോയെന്ന ചോദ്യത്തിന് മറുപടിയായി ഹിന്ദു അജണ്ടയെയും രാമക്ഷേത്ര നിര്‍മാണത്തെയും അംഗീകരിക്കുന്ന പാര്‍ട്ടിയെയായിരിക്കും വി എച്ച് പി പിന്തുണക്കുകയെന്ന് തൊഗാഡിയ പറഞ്ഞു.