വിജിലന്‍സ് കേസ് സപ്തം.15നകം പൂര്‍ത്തിയാക്കണം

കൊച്ചി: കണക്കില്‍ കവിഞ്ഞ സ്വത്ത് സമ്പാദിച്ചുവെന്ന കേസില്‍ മന്ത്രി കെ. വി. തോമസിനെതിരെ നടത്തുന്ന അന്വേഷണം സപ്തംബര്‍ 15നകം പൂര്‍ത്തിയാക്കാന്‍ ഹൈക്കോടതി വിജിലന്‍സ് വകുപ്പിനോട് നിര്‍ദേശിച്ചു.

ബിജു സി. വള്ളുവനാടന്‍ സമര്‍പ്പിച്ച പൊതുതാത്പര്യ ഹര്‍ജിയിന്മേല്‍ ചീഫ് ജസ്റിസ് ജെ. എല്‍. ഗുപ്ത, എ. കെ. ബഷീര്‍ എന്നിവരുള്‍പ്പെട്ട ഡിവിഷന്‍ ബെഞ്ചാണ് ജൂലൈ 11 വെള്ളിയാഴ്ച ഉത്തരവ് പുറപ്പെടുവിച്ചത്.

ഹൈക്കോടതി നിര്‍ദേശിച്ച പ്രകാരം കേസുമായി ബന്ധപ്പെട്ട എല്ലാ രേഖകളും വിജിലന്‍സ് ഹാജരാക്കിയിരുന്നുവെങ്കിലും ഡിവിഷന്‍ ബെഞ്ച് അവ പരിശോധിച്ചില്ല.

ദില്ലിയില്‍ നിന്നുള്ള യാത്രാമധ്യേയായതിനാല്‍ അഡ്വക്കറ്റ് ജനറല്‍ സിംഗ് എം. രത്നസിംഗ് കോടതിയില്‍ ഹാജരായില്ല. അഡ്വക്കറ്റ് ജനറല്‍ ദില്ലിയായതിനാലാണ് കേസ് വെള്ളിയാഴ്ചത്തേക്ക് വച്ചത്.

നേരത്തെ കേസുമായി ബന്ധപ്പെട്ട് കെ. വി. തോമസ് കോടതിയില്‍ എതിര്‍സത്യവാങ്മൂലം സമര്‍പ്പിച്ചിരുന്നു. രാഷ്ട്രീയ നേട്ടത്തിനായി കോണ്‍ഗ്രസിലെ ഒരു ഗ്രൂപ്പില്‍ പെട്ടയാള്‍ തനിക്കെതിരെ കേസ് നല്‍കുകയായിരുന്നുവെന്ന് തോമസ് എതിര്‍സത്യവാങ്മൂലത്തില്‍ പറഞ്ഞു.