അഴീക്കോട് എസ് എന്‍ ഡി പിക്കെതിരെ

കൊല്ലം: എസ് എന്‍ ഡി പി യോഗം രൂപീകരിച്ചത് ശ്രീചട്ടമ്പിസ്വാമികളുടെ ഉപദേശ പ്രകാരമാണെന്ന എന്‍ സി ഇ ആര്‍ ടി പാഠപുസ്തകത്തിലെ പരാമര്‍ശം സംബന്ധിച്ച് യോഗം നേതൃത്വം നിശബ്ദത പാലിക്കുന്നതിനെ സുകുമാര്‍ അഴീക്കോട് അപലപിച്ചു.

ശ്രീനാരായണ യോഗം സംഗമം-2003 ഉദ്ഘാടനം ചെയ്യുകയായിരുന്നു സുകുമാര്‍ അഴീക്കോട്. ചരിത്രവസ്തുതകള്‍ വളച്ചൊടിച്ചുള്ള പരാമര്‍ശമാണ് എന്‍ സി ഇ ആര്‍ ടി പാഠപുസ്തകത്തിലേതെന്ന് അദ്ദേഹം പറഞ്ഞു.

ഒരു സന്ന്യാസിയായിരുന്ന ചട്ടമ്പിസ്വാമികള്‍ ഒരു ബ്രഹ്മണ വിശ്വാസങ്ങളുടെ പരിമിതികള്‍ക്കുള്ളില്‍ നിന്നുകൊണ്ടാണ് പ്രവര്‍ത്തിച്ചിരുന്നത്. ശ്രീനാരായണഗുരുവിനെ പോലുള്ള ഒരു സാമൂഹ്യ പരിഷ്കര്‍ത്താവിനോട് അദ്ദേഹം സഹകരിച്ചിരുന്നുവെന്ന് കരുതുന്നതുതന്നെ അസംബന്ധമാണ്.

സ്വാമി വിവേകാനന്ദനുമായി ഡോ. പല്‍പ്പു നടത്തിയ കൂടിക്കാഴ്ചക്ക് ശേഷമാണ് ഗുരുവിന്റെ കാഴ്ചപാടുകളുടെ അടിസ്ഥാനമാക്കി യോഗം രൂപീകരിക്കുന്നത്. എന്‍ സി ഇ ആര്‍ ടി പാഠപുസ്തകത്തിലെ പരാമര്‍ശം ചില വര്‍ഗീയ ശക്തികളുടെ താത്പര്യങ്ങളോട് ചേര്‍ന്നുനില്‍ക്കുന്നതാണ്. എസ് എന്‍ ഡി പി യോഗം ഈ തെറ്റ് തിരുത്താന്‍ ശ്രമിക്കണം.

പത്രാധിപര്‍ കെ. സുകുമാരന്റെ പ്രതിമ അനാഛാദനം ചെയ്യുന്ന ചടങ്ങില്‍ എല്‍. കെ. അദ്വാനിയെ പോലുള്ള വര്‍ഗീയവാദിയെ ക്ഷണിച്ചതിനെയും സുകുമാര്‍ അഴീക്കോട് അപലപിച്ചു. ഹിന്ദുവര്‍ഗീയ വാദത്തിനെതിരായ ധീരനായ പോരാളിയായിരുന്നു കെ. സുകുമാരന്‍. മന്നത്ത് പത്മനാഭനോടൊത്ത് ഹിന്ദു മണ്ഡലം രൂപീകരിച്ചതിന് അദ്ദേഹം ആര്‍. ശങ്കറെ പോലും എതിര്‍ത്തിട്ടുണ്ട്.